Япониянинг Токио шаҳрида ўтказилаётган Олимпия ўйинларида иштирок этган ўзбекистонлик спорт гимнастикачиси Оксана Чусовитина саралаш баҳсларида 11-ўринни эгаллади ва финал йўлланмасини қўлга кирита олмади.
Оксана Чусовитина 1975 йил 19 июнь куни Бухоро шаҳрида туғилган. У спорт билан шуғулланишни 8 ёшида бошлаган. Узоқ йиллар давомида Светлана Кузнецова қўл остида спорт гимнастикасини ўрганиб келган. 1990 йил терма жамоа аъзосига айланган.
Спорт гимнастикаси бўйича Олимпия ўйинларида энг кўп иштирок этган спортчи (1992, 1996, 2000, 2004, 2008, 2012, 2016, 2020) ҳисобланади. 1992 йил Барселонада ўтган Олимпия ўйинлари олтин медали соҳиби, 3 карра Жаҳон чемпиони.
Оксана Чусовитина еттита ёзги Олимпия ўйинларида иштирок этган ер юзидаги ягона аёл гимнастикачи сифатида Гиннеснинг рекордлари китобига киритилган. Токиодаги олимпиада унинг учун саккизинчиси эди. Аввалроқ, у олимпиададан кейин фаолиятини якунлашини маълум қилган эди.
