13 июль куни бўлиб ўтган Халқаро пресс-клубда Ўзбекистон Журналистика ва оммавий коммуникациялар университети ректори ва Халқаро пресс-клуб раиси Шерзодхон Қудратхўжа вакцинация бўйича Ўзбекистон бошқа мамлакатларга қараганда яхши кўрсаткичда кетаётганлигини таъкидлади.
«Тошкентда коронавирус касаллигига чалинганлар кўпайиб боряпти. Биз барибир вакцина қилишга кучли эътибор қилишимиз керак. Миллатнинг ўзини-ўзи даволаши бу вакцина қилиш, эмлаш. Лекин ҳамма ҳам вакцина олишга улгурмади. Биз яхши кўрсаткичда кетяпмиз, масалан, бошқа давлатларга нисбатан. Баъзи инсонлар ҳар хил миш-миш гапларга ишоняпти», — дейди Шерзодхон Қудратхўжа.
12 июль ҳолатига Ўзбекистонда коронавирусга қарши тўлиқ эмланган фуқаролар 921 минг 623 нафар ёки Ўзбекистон аҳолисининг 2,64 фоизини ташкил қилмоқда (Давлат статистика қўмита маълумотларига кўра, Ўзбекистон аҳолисининг сони 34 млн 860 минг 170 нафар).
Ўтган йилнинг ноябрь ойида Санитария-эпидемиологик осойишталик ва жамоат саломатлиги хизмати бошлиғи ўринбосари Ботиржон Қурбонов 2021 йилнинг июнгача мамлакат аҳолисининг 60 фоизигачасини эмлаш режалаштираётганини маълум қилган эди.
Маълумот учун, 12 июлга қадар Исроилда 55,73%, АҚШда 47,90%, Туркияда 20,88%, Буюк Британияда 51,09%, Россияда 13,06%, Қозоғистонда 12,85 аҳоли коронавирусга қарши тўлиқ эмланган.
