Россия пойтахти Москва шаҳрида мигрантларни COVID-19 га қарши эмлаш жараёнлари бошланди, дея хабар бермоқда пойтахт мэрияси.
Маълумотга кўра, мигрантларни эмлаш Россия истеъмолчилар ҳуқуқларини ҳимоя қилиш ва инсон фаровонлигини назорат қилиш бўйича федерал хизматининг буйруғида кўрсатилган соҳаларга тегишли иш берувчиларнинг талабномасига биноан амалга оширилади.
Ҳозирда мигрантлар «Спутник Лайт» вакцинаси билан эмланмоқда.
Гамалея номидаги Миллий эпидемиология ва микробиология тадқиқотлар маркази томонидан ишлаб чиқилган мазкур вакцинанинг бир дозаси нархи 1300 рублни ташкил қилади.
Вакцина учун тўлов иш берувчи томонидан амалга оширилиши белгиланган.
Ташриф буюрувчилар аввал шифокор томонидан текширилади ва қўллаш мумкин бўлмаган ҳолатлар аниқланмаса, эмланади.
Хабарга кўра, эмлаш пунктларида барча эпидемиологик хавфсизлик қоидаларига риоя қилинади: махсус белгилар қўйилиб, вакциналарни сақлаш учун музлатгичлар ўрнатилган. Бундан ташқари, ташриф буюрувчилар оқимини ажратиш таъминланиши кўзда тутилган. Вакцинация жараёнлари соат 09:00 дан 21:00 гача олиб борилади.
Аввалроқ, Россия пойтахтидаги кафе ва ресторанларга фақат махсус QR-код тақдим этилгандан кейингина ташриф буюриш мумкинлиги ҳақида хабар берган эдик.Код коронавирусга қарши тўлиқ эмланганлар, кафега келишдан аввал, ярим йил ичида COVID-19 билан касалланганлар ёки уч кундан кечиктирмай ПЦР тестининг манфий натижасини олганларга берилади.
