Адлия вазирлиги тадбиркорлар учун ягона ҳуқуқий манба — Тадбиркорлик кодексини ишлаб чиқмоқда. Бу ҳақда адлия вазири Русланбек Давлетов 16 июнь куни Савдо-саноат палатаси қурултойи доирасида маълум қилди, дея хабар берди Адлия вазирлиги матбуот хизмати «Газета.uz»га.
Лойиҳа қонунчиликдаги энг замонавий услублардан ҳисобланган «One in two out» (ҳар қандай янги бошқарув икки эскисини бекор қилиши керак), бизнес жараёнлар реинжиниринги (BPR) концепциялари асосида ишлаб чиқилмоқда, деди у.
Тадбиркорлик кодекси нима учун керак?
Биринчидан, айни вақтда тадбиркорлик фаолиятини бошқарувчи қонунчилик ҳужжатлари тарқоқ ва улар сони жуда кўп. Хусусан, тадбиркорлик фаолияти билан боғлиқ 5000 га яқин норматив-ҳуқуқий ҳужжатлар қабул қилинган.
Ҳужжатларнинг ҳаддан зиёд кўп бўлиши улар ўртасида қарама-қаршиликларни вужудга келтириб, тадбиркорлик амалиётини қийинлаштириши мумкин. Бу эса, ўз навбатида, тадбиркорлик субъектларининг ҳақли эътирозларига сабаб бўлади.
Вазир «тадбиркор ишлаши, ўз ғояларини амалга ошириши кераклигини» таъкидлаб ўтди.
«Агарда у қоғозбозлик ва бюрократияга ботган бўлса, ким унинг ишини бажаради? Шунинг учун унинг қўлида битта ҳуқуқий меъёрлар тўплами бўлиши керак. Масалан, Японияда тадбиркорда фақат битта Тижорат кодекси мавжуд, у шунга суяниб ўз тадбиркорлик фаолиятини амалга оширади», — деди у.
Иккинчидан, соҳани ҳуқуқий тартибга солишда, замонавий тенденцияларни ҳисобга олган ҳолда бўшлиқларни бартараф этишда янги ижтимоий муносабатларни тўлиқ ҳуқуқий тартибга солиш масаласи турибди, деб таъкидлади Русланбек Давлетов. Масалан, «ўрта бизнес» мезонлари, инновацион тадбиркорликни жорий этиш, электрон тижорат (стартап корхоналар, инновацион кластерлар, технопарклар ва бошқалар).
Унинг сўзларига кўра, Тадбиркорлик кодексининг қабул қилиниши турли хил можаролар мавжуд бўлган хилма-хил қонун ҳужжатларини ягона ҳужжатга бирлаштириш, тадбиркорлик соҳасидаги қонунчилик ҳужжатларини меъёрлаштириш, давлатнинг тадбиркорлик соҳасидаги аралашувини камайтириш, шунингдек, тадбиркорлик ҳуқуқи соҳасида ягона ёндашувнинг аниқлаб олинишига ёрдам беради.
Лойиҳанинг сентябрь ёки октябрь ойларида мажбурий тартибда жамоатчилик муҳокамасига тақдим этилиши кутилмоқда. Адлия вазирлиги тадбиркорларни, соҳанинг илмий вакилларини, соҳа мутахассисларини, экспертларни ва бошқаларни кодексни ишлаб чиқиш жараёнида фаол иштирок этишга чорлайди.
Адлия вазири бундан олдин ҳам тадбиркорлик соҳасидаги муаммолар ва уларни ҳал этиш йўллари ҳақида гапирган эди. «Биз турли хил ташкилот ва муассасаларни яратиб, қонунларни қабул қилиш орқали тадбиркорларга қанчалик ёрдам беришга ҳаракат қилишимиздан қатъи назар, энг катта ёрдам икки омилдан иборатлигини тан олишимиз керак: ҳамма учун тенг шароит яратиш ва тадбиркорни ўз ҳолига қўйиш», — деган эди у.
