Олий Мажлис Сенати раиси Танзила Нарбаева Amerika Ovozi`га берган интервьюсида Ўзбекистон парламенти тўлиқ мустақил бўлганини таъкидлади.
У парламент президентга қарам деган фикрга қўшилмайди.
«Парламент Президентнинг айтганини қилади деган гап аввалги вақт учун тўғри келар эди, аввалги вақтдаги дунёқараш бу. Аввал ҳақиқатан ҳам парламент президент айтган масалаларни кўриб чиқар эди. Ҳаттоки қарор қабул қилишда ҳам келишилар эди. Лекин ҳозир бундай эмас. Биз энди кун тартибимизни ўзимиз шакллантирамиз. Биз, масалан, энергетика соҳасини ёки Сардоба фожеасини бемалол ўргандик. Жойига чиқиб муҳокама қилдик, мутасаддиларни чақириб сўроқ қилдик, топшириқлар бердик. Бу парламентнинг эркинлигидан эмасми?!» — дейди Нарбаева.
Шунингдек, Сенат раиси парламент ишни «кимгадир ёқиш» учун қилмаётганини таъкидлаб ўтди.
«Энг асосийси, президент айтганидек, одамларни рози қилиш. Бизлар эса халқ вакилимиз… Қилаётган ишларимиз президентга ёқади. Биз президентнинг сиёсатини биламиз. Уларниг сиёсати одамларни рози қилиш» — деб айтиб ўтди у.
Нарбаева ўз интервьюсида парламентга ҳеч қандай босим йўқлигини алоҳида таъкидлади.
«Биз батамом мустақилмиз. Бизга ҳеч қандай босим ҳам йўқ, ҳеч ким бизга „айтганимни қил“, „у масалани кўр, бу масалани кўрма“ демайди, бу гаплар аллақачон кун тартибидан чиқиб кетган» — деди Сенат раиси.
Танзила Нарбаева Сенат баъзи бир қонунларни қайтариб юборишини ҳам айтиб ўтди.
«У қонунни президент администрацияси аввал кўрган бўлиши мумкин ёки Қонунчилик палатасида 150 нафар депутат тасдиқлаган бўлиши мумкин. Лекин у қонун инсон ҳуқуқлари бўйича стандартларга жавоб бермаса, бизнинг рейтингимизга таъсир қиладиган бўлса, қандайдир идоралар манфаатлари ётган бўлса биз уни албатта қайтариб юборамиз. Масалан, 2020 йилда 6 та қонунни қайтариб юбордик» — деди Нарбаева.
Олдинроқ президент Шавкат Мирзиёев мамлакатнинг иқтисодий-ижтимоий ҳаёти билан боғлиқ деярли барча масалаларни президент ҳужжатлари билан тартибга солишга мажбур бўлишаётганлигини таъкидлаган эди.
