Президент Шавкат Мирзиёев 2 февраль куни мамлакатдаги сиёсий партиялар раҳбарлари билан учрашди, дея хабар бермоқда давлат раҳбарининг матбуот хизмати.

Учрашувда сиёсий партиялар ўз депутатлари орқали жойлардаги ижтимоий-иқтисодий муаммоларни ўрганиши, уларнинг ечими бўйича таклифлар бериши, айниқса, таъсирчан Парламент ва жамоатчилик назоратини олиб бориши муҳимлиги қайд этилди.


«Адолатли мезон бўлса, тўрт йилда қилган ислоҳотларимиз… парламентимиз қандай эди-ю, қандай бўлди. Депутатларни обрўси қандай эди-ю, қандай бўлди. Ўзларингни фикрларингни айтяпсизлар, ўзларингни йўналишларингни айтяпсизлар… Сизлар билан учрашишимдан мақсад — қуйи поғонадаги Кенгашларнинг обрўсини кўтармасак, қуйи поғонадаги Кенгашларда ҳар битта партиянинг овози бўлмаса, талаб қилмаса, рақобат бўлмаса, натижа бўлмайди», — деди президент.

Шавкат Мирзиёев 2,5 миллион аъзога эга сиёсий партиялар ва ижро ҳокимияти ўртасида жойларда яқин ҳамкорлик умуман йўқлигини таъкидлади. «Бугунги кунда сиёсий партияларнинг энг қуйигача, маҳаллагача тушиб ҳалқнинг муаммоларини ўрганиб, уларни ҳал қиладиган чинакам кучга айланганми йўқми», — дея таъкидлади президент.

Иштирокчилар ҳар бир партия ўз дастурий мақсадларини Парламентга фаол олиб чиқиши, ўз фракциялари орқали қонунчилик ташаббусларини илгари суриши ва қонунлар ижросини таъминлашни назоратига олиши зарурлиги ҳақида фикр алмашишди.

Сенат раиси Танзила Нарбаева ва Қонунчилик палатаси спикери Нурдинжон Исмоилов.

«Биз мамлакатнинг иқтисодий-ижтимоий ҳаёти билан боғлиқ деярли барча масалаларни президент ҳужжатлари билан тартибга солишга мажбур бўляпмиз. Мисол учун, ўтган йили парламент томонидан қабул қилинган 70 та қонун орасида депутатлар ташаббуси билан партия вазифаларидан келиб чиқиб киритилган қонунларни бармоқ билан санаса бўлади», — деди давлат раҳбари.

Президент партияларнинг «ёшлар ва аёллар қанотлари ҳам номига ишлашини» таъкидлади. «Партиялар бундан кейин фаолиятини тизимли йўлга қўйиши, муҳим масалалар бўйича аниқ аниқ натижалар кўрсатиши кераклигини ҳаётнинг ўзи талаб қилмоқда», — деди у.

Президент Шавкат Мирзиёев 2017 йилги Парламентга мурожаатида депутатларни ташабус кўрсатмаслиги учун танқид қилган эди. Ўшанда у 136 та қонунчилик ташаббусидан бор-йўғи 27 таси депутатларга тегишли бўлиб, улар ҳам асосан амалдаги қонунларга президентнинг фармон ва қарорларидан келиб чиқадиган ўзгартиш ва қўшимчалар эканлигини таъкидлаган. Президент бу парламент фаолияти самараси етарли эмаслигини кўрсатишини айтган эди.

«Нима, ислоҳотларни амалга ошириш учун фақат Президент фармон ва қарорлар қабул қилиши керакми? Афсуски, парламентимиз фаолияти кўп ҳолларда шунчаки расмий йиғилишлардан иборат бўлиб қолмоқда.Нима учун аниқланган муаммолар ёки сайловчилар кўтараётган масалалар тегишли қонунлар қабул қилиш йўли билан ёки ижро ҳокимияти олдига масалани қатъий қўйиш билан ҳал этилмаяпти?», — деганди ўшанда президент.

Олдинроқ Сенат раиси Танзила Нарбаева депутатлар «сўраши эмас, талаб қилиши кераклигини» айтган эди.