Республика махсус комиссиясининг қарорига асосан, жорий йилнинг 20 февралидан Ўзбекистонда халқаро кўргазма ва ярмаркаларни ўтказишга рухсат этилди.
Таъкидланишича, бу тегишли равишда Инвестициялар ва ташқи савдо вазирлиги ҳамда Соғлиқни сақлаш вазирлиги билан келишилган. Тадбирлар санитария-эпидемиология меъёрлари ва қоидаларига қатъий амал қилган ҳолда ўтказилиши назорат қилинади.
Халқаро кўргазма ва ярмаркаларни ташкил этишга қўйиладиган талаблар:
- ташкилотчи Республика ҳудудида санитария-эпидемиология хизмати ходимларини шартнома асосида жалб қилади. Тадбирларнинг барча босқичларида эпидемиологик тартибларга риоя этилиши устидан назоратни таъминлаши шарт;
- барча тадбир иштирокчиларидан ҳимоя ниқоби ёки респиратор тақишлари талаб қилинади;
- тадбирга киришда барча иштирокчиларнинг ҳарорати ўлчанади. Юқори ҳарорат ёки юқумли касалликлар белгилари бўлган шахсларга тадбирда қатнашишга рухсат берилмайди;
- экспозициялар орасидаги масофа кенглиги камида 3 метр бўлиши керак;
- тадбир ўтказиш жойларида шамоллатиш тизимлари кираётган ҳавонинг чиқаётганидан устунлигини таъминлаши керак.
Аввалроқ, 28 январдан эътиборан концерт тадбирларини ўтказишга ҳамда умумий овқатланиш объектларига 23:00 дан кейин ишлашга рухсат берилган эди.
