Хитой вакцинасининг синов босқичларида иштирок этувчи кўнгиллилар сони 4 минг кишига оширилди. Бу ҳақда Инновацион ривожланиш вазирлиги маълум қилди.
Ўзбекистонда Хитойнинг Zhifei Loncom Biofarmaceutical компаниясининг ZF 2001 вакцинаси учинчи синов босқичларида 5 минг нафар кўнгилли қатнашаётган эди. Эндиликда синовларда 9 минг нафар кўнгилли иштирок этади.
Вазирликнинг изоҳига кўра, бунинг биринчи сабаби, иккинчи ва учинчи доза эмлаш босқичида тадқиқот иштирокчилари сони камайиши мумкин.
Иккинчидан, мамлакатда коронавирус билан боғлиқ вазият барқарорлашгани боис, коронавируснинг вакцина олганларга таъсирини ўрганиш қийинлашаётганлиги айтилмоқда. «Вакцинанинг таъсири организмга вирус таъсир қилганда аниқланади», — дейилади хабарда.
Вакцина синовларида иштирок этаётган кўнгиллиларнинг ярми вакцина эмас, плацебо олаётгани таъкидланган.
Хитой вакцинаси учинчи босқич синовлари Ўзбекистонда 2020 йил 10 декабрь куни бошланган эди. 30 январь ҳолатига кўра, вакцина олган кўнгиллилар сони 5300 га яқинлашган эди.
