Компаниянинг 5−10 фоиз улушини сотиб олмоқчи бўлган инвесторлар Telegram’ни 30 млрд долларга баҳолашди. Бу таклифни мессенжер асосочиси Павел Дуров рад этди, дея хабар қилди The Bell.
Aввалроқ The Information яқин келажакда Telegram катта миқдордаги кредитни (тахминан 1 млрд доллар) жалб қилиши мумкинлиги ҳақида хабар берган эди. Кейинчалик қарз IPO орқали акцияларга айлантирилиши мумкин бўларди.
Бундай хабар тарқалганидан сўнг Дуров ўзи бирон бир «банк ва инвестор» билан учрашмаганлигини айтди, аммо унинг жамоасига таклифлар тушаётганини таъкидлади. Унинг айтишича, мессенжер учун кредит олиш «монетизация» (тижоратлаштириш) стратегиясини амалга оширишда тўлиқ мустақил ва ўз қадриятларига содиқ қолиш усулларидан биридир.
2015 йилда Павел Дуров «Секрет Фирмы» нашри билан суҳбатда, ўша пайтда олган таклифларга асосланиб, компаниянинг мумкин бўлган қийматини 3−4 млрд долларга баҳолаган эди. Ўша пайтда мессенжерда ойига 60 миллионга яқин фаол фойдаланувчилар бор эди.
Эслатиб ўтамиз, январь ойининг илк ҳафтасида Telegram’даги фаол фойдаланувчилар сони 500 миллиондан ошди.
