Япония парламенти аҳолини бепул эмлаш тўғрисидаги қонунни қабул қилди
Япония парламентининг юқори палатаси аҳолини коронавирусга қарши бепул эмлаш тўғрисидаги қонун лойиҳасини маъқуллади. «Ушбу қонунчилик доирасида Япония ҳукумати келаси йилнинг ўрталарига қадар бутун аҳолини эмлаш учун зарур бўлган дозаларни тайёрлашни режалаштирмоқда», деди Япония Вазирлар Маҳкамаси бош котиби Кацунобу Като. Бепул вакцинациядан ташқари, янги қонунда эмлаш натижасида соғлиги зарар кўрган фуқаролар учун тиббий харажатлар қопланиши кўзда тутилган. — ТАСС.
Шимолий Корея хакерлари олтита фармацевтика компаниясига ҳужум қилди
Aвгуст ойидан бери Шимолий Корея хакерлари COVID-19 га қарши дори воситаларини яратиш билан шуғулланадиган камида олтита фармацевтика компаниясининг маълумотлар базасига киришга ҳаракат қилишди. Булар АҚШнинг Johnson & Johnson Novavax, Жанубий Кореянинг Genexine, Shin Poong Pharmaceutical ва Celltrion, шунингдек Буюк Британияда жойлашган AstraZeneca PLC компанияларидир. Шимолий кореялик хакерлар бирон бир фойдали маълумотни қўлга киритгани номаълум бўлмоқда. — The Wall Street Journal.
БААнинг Falcon Eye 2 сунъий йўлдоши Ер орбитасига чиқарилди
Фото: arianespace.com
Россиянинг «Союз-СТ» ракета ташувчиси БААнинг Falcon Eye 2 сунъий йўлдоши билан Куру космодромидан парвоз қилди. Парвоз Франция Гвианасидаги Куру космодромидаги ракета комплексидан Тошкент вақти билан соат 06:33 да амалга оширилди. Falcon Eye 2 ерни кузатувчи юқори аниқликдаги оптик-электрон сунъий йўлдош бўлиб, у БAA Қуролли Кучлари манфаатлари ҳамда фуқаролик лойиҳаларини амалга ошириш учун вазифаларни бажаради. — Arianespace.
Дунёда 40 миллиондан ортиқ одам қулликда яшайди
БМТ бош котиби Антониу Гутерриш дунё бўйлаб 40 млндан ортиқ одам қулликнинг замонавий шаклларига бўйсунишини таъкидлади. «Бугунги кунда 40 миллиондан ортиқ одам замонавий қуллик қурбонига айланмоқда. Aёллар ва қизлар бу кўрсаткичнинг 71 фоизини ташкил қилади», — деди БМТ бош котиби. «Қашшоқ ва маргинал гуруҳлар, хусусан, ирқий ва этник озчиликлар, маҳаллий халқлар ва мигрантлар замонавий қуллик шаклларига номутаносиб таъсир кўрсатмоқдалар. Гендер тенгсизлиги эса дискриминация моделини янада кучайтирмоқда», — дея қўшимча қилди у. — ТАСС.
Россияда коронавирусга қарши оммавий эмлашни бошлаш бўйича кўрсатма берилди
Владимир Путин кейинги ҳафта охирида Россияда коронавирусга қарши кенг қамровли вакцинацияни бошлашни буюрди. Қайд этилишича, биринчи бўлиб ўқитувчилар ва шифокорлар эмланиши кутилмоқда. Оммавий эмлаш бепул ва кўнгилли равишда амалга оширилиб, бунинг учун «Спутник V» вакцинасидан фойдаланилади. — Газета.uz
Буюк Британияда кейинги ҳафтадан коронавирусга қарши эмлаш бошланади
Буюк Британия Тиббиёт ва соғлиқни сақлаш маҳсулотлари регулятори Pfizer/BioNTech вакцинасидан фавқулодда ҳолатда фойдаланиш учун рухсат берди. Юқори риск гуруҳидагилар кейинги ҳафтадан бошлаб коронавирусга қарши эмланади. Вакцина ва иммунизация бўйича қўмита биринчи навбатда вакцина билан эмланиши керак бўлган гуруҳлар, жумладан қариялар уйида яшовчилар, соғлиқни сақлаш тизими ходимлари, катта ёшдагилар ва клиник жиҳатдан оғир аҳволдагилар учун маслаҳатларни эълон қилишини маълум қилди. — Газета.uz
