Халқ таълими вазири Шерзод Шерматов ўзининг Telegram канали орқали пиёда юриб шахсий намуна кўрсатиш мақсадида 10 минг қадам босиб ўтганини маълум қилди.
«Якшанба куни пешинда Хоразмдан қайтгач, тушликдан сўнг ишхонага яёв юриб боришни бир текшириб кўришга ҳаракат қилдим. Тахминан 2 соатларда 9 километрни бемалол юриб борса бўлар экан. Албатта, бирдан кўп юрилганига эртасига озгина оёқ оғриғи бўлдию, кейин ўтиб кетди. Эртаси куни эса одам ўзини анча тетик хис қилиб, яна яёв юргиси келаркан», — дея таъкидлайди вазир.
Шерзод Шерматов вазирлик янги бинога кўчиб ўтганидан кейин, ишхонада 8 қаватга лифтдан фойдаланмай чиқишни йўлга қўйганлигини таъкидлайди. Вазирнинг сўзларига кўра, кейин зинадан фойдаланиш ходимлар орасида оммалашган. «Шунинг учун ҳам, шахсий намуна дейилгани бежизга эмас», — дейди у.
«Насиб қилса, пандемиядан қутилиб, давлат ишидаги раҳбар кадрларда соғлом турмуш тарзига риоя қилиш бўйича шахсий намуна кўрсатишига янада кўпроқ вақт бўлади», — дея якунлайди Халқ таълими вазири.
Эслатиб ўтамиз, президент фармонига асосан, 2021 йилдан бошлаб давлат органлари раҳбарлари ва барча ходимлари иш вақтидан сўнг ҳафтада камида бир марта жисмоний тарбия билан шуғулланишади.
Раҳбарлар шахсий наъмуналари орқали семизлик даражасини камайтириш, вазн кўрсаткичларини яхшилаш, саломатликни мустаҳкамлаш учун қаратилган чора-тадбирларни амалга оширишади.
