Сарвар Нажимович Бобохўжаев Тошкент ахборот технологиялари университети (ТАТУ) ректори этиб тайинланди. Бу ҳақда университет матбуот хизмати хабар берди. Ушбу лавозимга тайинлангунига қадар олдин у Вазирлар Маҳкамаси ҳузуридаги Президент, ижод ва ихтисослаштирилган мактабларни ривожлантириш агентлиги директори лавозимида фаолият юритиб келган.
Сарвар Бобохўжаев 1978 йилда Тошкент шаҳрида туғилган. У Тошкент давлат техника университети ва Япония халқаро университети битирувчиси.
2016−2018 йилларда у Тошкент шаҳридаги Инха университетини бошқарган, 2018 йилдан 2019 йилгача эса Халқ таълими вазирининг ўринбосари бўлиб ишлаган. У ўтган йилнинг сентябрь ойидан бери махсус ва президент мактабларини ривожлантириш агентлигини бошқариб келган.
«Газета.uz» нинг ҳукуматдаги манбасининг хабар беришича, илгари Муҳаммад ал-Хоразмий номидаги ихтисослаштирилган ахборот-коммуникация технологиялари мактабининг директори бўлиб ишлаган Хилола Ўктамовна Умарова махсус ва президент мактабларини ривожлантириш агентлигининг янги раҳбари бўлди.
2016 йилдан бери ТАТУни бошқариб келаётган Тўлқин Зокирович Тешабоев Тошкент молия институти ректори этиб тайинланди.
Тўлқин Тешабоев ўз ишини ТАТУда Автоматлаштирилган телекоммуникациялар кафедрасида лаборант сифатида бошлаган. 1994−2003 йилларда у университетнинг бирлашган касаба уюшмасини бошқарган ва 2003 йилдан 2009 йилгача молиявий-иқтисодий масалалар бўйича проректор бўлиб ишлаган. 2009−2012 йилларда у Ўзбекистон алоқа ходимлари касаба уюшмалари марказий кенгашининг раиси сифатида фаолият юритган. 2012−2014 йилларда ТАТУ ўқув ишлари бўйича биринчи проректори бўлган. 2014 йилдан 2016 йилгача эса у Ўзбекистон касаба уюшмалари Федерацияси Кенгаши раиси ўринбосари бўлиб ишлаган.
