8 сентябрь куни Беларусь президенти Александр Лукашенко Минскдаги Мустақиллик саройида Россия оммавий ахборот воситаларига интервью берди. У билан суҳбатлашиш учун Russia Today телеканалининг бош муҳаррири Маргарита Симонян, «Первый канал» мухбири Антон Верницкий, «Россия 1» телеканалининг «Вести» дастури бошловчиси Евгений Рожков ва «Говорит Москва» радиостанциясининг бош муҳаррири Роман Бабаян келишди. Суҳбатдаги асосий фикрлар ҳақида Беларуснинг TUT.by портали хабар берди.
Президентлик сайловларидан кейинги норозилик намойишлари ҳақида
Александр Лукашенко Беларусдаги вазиятга асосан ташқи аралашув таъсир кўрсатаётганига ва норозилик намойишлари Польша, Чехия, Литва ва Украинадан олиб борилаётганига аминлигини билдирди. У, шунингдек, норозилик намойишлари ижтимоий тармоқлар орқали мувофиқлаштирилаётганлигини айтиб ўтди.
«Буларнинг барчаси глобаллашган ва халқаро миқёсда олиб борилмоқда. Агар бой Россия буни уддалай олади, деб ўйласангиз, янглишасиз. Мен кўплаб президентлар билан суҳбатлашдим, катта дўстим, мен уни акам дейман, Путин билан суҳбатлашдим. Мен уни огоҳлантирдим: бунга қарши туриш мумкин эмас. Чунки телеграм-каналларига қандай қарши туриш мумкин? Сизда ушбу телеграм-каналларини блоклаш имконияти борми? Ҳеч кимда, ҳатто уни ихтиро қилганларда ҳам бундай имконият йўқ. Америкаликлар. У ерда нима бўлаётганини кўряпсизку. Телеграм-каналлар у ерда етакчи роль ўйнамоқда. Аммо бу воқеани улар ўйлаб чиқишган, улар бошладилар, узоқ вақт олдин. Буни Россия ёки Беларусь бошлагани йўқ, улар ҳар доим шу билан шуғулланган. Ва ўз мақсадига эришди. Шунинг учун Худо хайрини берсин уларни. Биз эса улар қилган ишнинг оқибатларини кўраяпмиз. Интернетни ва ҳоказоларни олиб ташласак ҳам… Ушбу телеграм-каналлар Польшадан ишлайди», — деди у.
«Шунинг учун сизлар ҳам бўшашманглар. Сизда ҳам тез орада маълум сиёсий воқеалар юз беради ва эҳтимол, йўқ жойдан. Россия раҳбарияти билан биргаликда нима хулосага келганимизни биласизми? Агар бугун Беларусь қуласа, кейинги навбат Россия бўлади», — дея огоҳлантирди Александр Лукашенко.
«Агар Лукашенко ҳозир қулаганида, бутун тизим қулаб, Беларусь унинг ортидан қулаган бўлар эди. Мен у бутунлай орқага кетади деб айтмоқчи эмасман. Ўйлайманки, узоққа орқалаб кетарди. Эҳтимол, кимдир қудратли елкасини суянчиқ қиларди. Лекин ҳозир бу жуда қийин бўлар эди», — дея қўшимча қилди у.
Беларусь раҳбари у учун ҳаётдаги энг муҳим нарсани айтиб ўтди. «Агар менинг чўнтагимда бир неча миллиард пул бўлганида, эҳтимол мен Порошенко каби ҳаракат қилган бўлардим. Албатта, бунинг эҳтимоли кам, бу ҳақида ўйламайман. Аммо менда бу миллиардлар бўлмасачи? Шунинг учун, мен қўрқмайман. Мен ҳатто уйдагиларга ҳам айтаман, чунки болалар унчалик қабул қилмайдилар: „Болалар, бугун бўлмаса, эртага. Ким билади, мен қачон Унинг олдига бораман, қачон У мени олдига чақиради“. Қачондир мен кетарман, балки, лекин мен одамлар билан, шу авлод билан яратган нарсаларимизни йўқ қилишларига йўл қўймайман. Бу менинг ҳаётим ва қаранг мамлакат қандай ўзгарган».
Ҳокимият ва қурол билан кўриниш бергани ҳақида
Александр Лукашенко узоқ вақт давомида ҳокимият бошқарувида турганлигини истисно қилмади: «Ҳа, мен бироз кўпроқ ҳокимиятда ўтирворгандирман. Эҳтимол, мени нафақат телевизордан, балки дазмол ва чойнакдан ҳам кўрсатишар. Лекин ҳозирги вақтда фақат мен Беларусни ҳимоя қила оламан. Мен шунчаки кетмайман. Мен чорак асрдан бери Беларусни обод қилганман. Мен шунчаки ундан воз кечмайман. Қолаверса, мен кетсам, менинг тарафдорларимни сўйишни бошлашади! Биз Конституцияни ислоҳ қилишга тайёрмиз, шундан сўнг муддатдан олдин президент сайловлари ўтказилиши ҳам мумкин».
«Менинг қурол билан кўриниш беришим фақат битта нарсани англатади: мен ҳеч қаерга қочиб кетмадим ва мамлакатни охиригача ҳимоя қилишга тайёрман», — деди у.
Мария Колесникованинг ҳибсга олингани ҳақида
Журналистлар Аляксандр Лукашенкодан мухолифат мувофиқлаштириш кенгаши аъзоси Мария Колесникованинг мамлакат чегарасида ҳибсга олиниши билан боғлиқ вазият ҳақида сўрашди.
«Бу ҳақда батафсилроқ айта олмайман, чунки менга фақатгина у ва унинг ёки дўстлари ё ҳайдовчилари ё яқинлари Украинага қочганини айтишди. Уларнинг ҳужжатлари олдиндан расмийлаштирилган бўлган. Улар бизнинг ҳудудда паспортларини кўрсатдилар. Божхона ходимлари, чегарачилар уларни ўтказиб юборишди. Кейинчалик — давлат чегараси ва украинлар пости келади. Аммо бу постлар орасида 8−9 км бор. Ўша ерда, биз ўз томонимиздаги постдан кейинги ҳудудни кучайтирганмиз. Чегара қаттиқ қўриқланади, шунинг учун биз пост ўрнатдик. Табиийки, улар тўхтатилди. Улар эса машиналарида давом этишди. Уни ҳаракатдаги машинадан улоқтиришди. Ҳаракат пайтида. Улар машинада учта эди, ким уни улоқтириши мумкин? Бизнинг чегарачилар, албатта, уни тартиб бўйича қўлга олишди ва уни чегара отрядига жўнатишди, мен буни қари чегарачи сифатида айтаман. Қолганлар эса Украина чегарасидан ўтган. Менга хабар беришича, Украина постида улар ҳибсга олинган. Уларни бизга қайтариб беришлари учун биз улар билан музокара олиб бораяпмиз», — дея жавоб берди президент.
Мухолифатнинг мувофиқлаштириш кенгаши ҳақида
Александр Лукашенко кенгаш билан гаплашмаслигини айтар экан, «бу одамларнинг кимлигини билмайман», дея таъкидлади. «Улар ҳеч қандай мухолифат эмас. Уларнинг таклиф этаётгани Беларусь давлати ва Беларусь халқи учун ҳалокатдир. Улар бизга биродар бўлган Россия билан барча алоқаларни узмоқчилар, бизда пуллик таълим ва тиббиёт бўлишини хоҳлашмоқда. Улар бизнинг барча саноат корхоналаримиз вайрон бўлишини ва ишчилар ишсиз қолишини истайдилар», — дея президент сўзларидан иқтибос келтиради Роман Бабаян ўзининг Telegram каналида.
