Беларусда Мувофиқлаштирувчи кенгаш ташкил этилиши юзасидан жиноий иш қўзғатилди. Бу ҳақда мамлакат бош прокурори Александр Конюк маълум қилди.
«Бу каби кенгашларнинг ташкил этилиши ва фаолияти давлат ҳокимиятини эгаллаб олиш, шунингдек, Беларусь миллий хавфсизлигига зарар етказишга қаратилган», — деди бош прокурор.
Ушбу жиноий иш мамлакат жиноят кодексининг 361-моддаси (Беларусь миллий хавфсизлигига зарар етказишга қаратилган ҳаракатларга чақирув) бўйича қўзғатилди.
Президентликка номзод Светлана Тихановская тарафдорлари томонидан ташкил этилган Мувофиқлаштирувчи кенгашнинг биринчи йиғилиши 19 август куни бўлиб ўтди, дея хабар берди TUT.by портали. Эслатиб ўтамиз, кенгаш, унинг таъсисчиларига кўра, ҳокимиятни топширишни ташкил этиш ва жамият розилигини таъминлаш мақсадида тузилган.
Кенгаш президиумига адабиёт бўйича Нобел мукофоти совриндори Светлана Алексиевич, Виктор Бабариконинг сайлов штаби собиқ раҳбари Мария Колесникова, собиқ маданият вазири Павел Латушко, адвокат Лилия Власова, Минск трактор заводининг иш ташлаш бўйича комиссияси фаоли Сергей Дилевский, адвокат Максим Знак ва Светлана Тихановскаянинг ишончли вакили Ольга Ковалькова кирган.
Йиғилишда зўравонликка чек қўйиш, сиёсий маҳбусларни озод этиш ва сайлов натижаларини бекор қилиш талаби илгари сурилган резолюция қабул қилинди. Кенгаш президент маъмурияти билан алоқа ўрнатишга уринганини, аммо бу натижа бермаганини айтди. Мария Колесникованинг таъкидлашича, кенгаш ўз олдига конституциявий тузум ва ташқи сиёсатни ўзгартириш мақсадини қўймаган ва тинч намойишларга чиқиш орқали ўз фикрларини ифода этувчи инсонларни қўллаб-қувватлайди.
Беларусда бир ҳафтадан бери норозилик намойишлари давом этмоқда. Бунга мамлакатда ўтказилган президентлик сайловлари натижалари сабаб бўлди. Сайловда Александр Лукашенко 80,1% натижа билан ғалаба қозонди. Унинг асосий рақиби Светлана Тихановская эса 10,1 фоиз овоз тўплаган, 4,59 фоизи барчасига қарши овоз берган. Тихановскаянинг тарафдорлари унинг ғалаба қозонганига ишонишмоқда.
Чоршанба куни «Беларускалий», «Нафтан», «Гродно-Азот», МТЗ ва МЗКТ корхоналарида норозилик акциялари давом этди. Шу билан бирга, Александр Лукашенко тарафдорлари ва мухолифларининг митинглари ҳам бўлиб ўтди.
Норозиликлар пайтида хавфсизлик кучлари томонидан ўқ узилган брестлик Геннадий Шутов Минск касалхонасида вафот этди. Тергов қўмитасининг маълум қилишича, эркак ҳуқуқ-тартибот идоралари ходимларига ҳужум қилган ва улардан бирининг қуролини эгалламоқчи бўлган. Бу президентлик сайловларидан бери намойишларнинг учинчи қурбони. Биринчиси Александр Тарайковский бўлган. У, Ички ишлар вазирлигининг маълумотларига кўра, хавфсизлик кучларига портловчи мосламани ташламоқчи бўлган, бироқ портловчи ускуна унинг қўлида портлаган. Гомелда эса намойишларнинг биринчи кунида севган қизининг олдига кетаётганда ҳибсга олинган 25 ёшли Александр Вихор вафот этган.
Халқаро ҳамжамият Беларусдаги вазиятга турлича муносабат билдирмоқда. Европа Иттифоқи сайлов натижаларини тан олмади, овоз бериш натижаларини қалбакилаштириш ва зўравонлик учун жавобгарларга қарши санкцияларни қўллаш режалаштирилмоқда. Литва Ташқи ишлар вазирлиги мамлакатга кириши таъқиқланган шахслар рўйхатига Александр Лукашенка ва яна 31 амалдорни киритди.
Россия ҳукумати Беларусдаги вазиятга билвосита ва ҳатто тўғридан-тўғри аралашув содир бўлаётганини айтмоқда, аммо бу давлатларнинг аниқ номлари айтилмаган. Бундан ташқари, Россия президентининг матбуот котиби Дмитрий Песков Мувофиқлаштириш кенгаши аъзоси Павел Латушко томонидан бир кун олдин эълон қилинган, Россиянинг Беларусь мухолифати билан суҳбат олиб боришни режалаштирилмаётганини, бунинг ички ишларга аралашув бўлишини таъкидлади.
