Корхоналар ва ташкилотлар ягона давлат регистри маълумотларига кўра, Дилшод Шухратович Икромов Ягона умумреспублика процессинг марказининг (ЕОПЦ, Uzcard бренди) бош директори бўлди. Бу хабарни Марказий банк матбуот хизмати ҳам «Газета.uz»га тасдиқлади.
Ушбу тайинловга қадар Дилшод Икромов Марказий банкнинг Ахборот технологиялари департаменти директори лавозимида ишлаган. Илгари у Миллий банклараро процессинг маркази (НМПЦ, Humo бренди) директорининг биринчи ўринбосари бўлиб ишлаган.
ЕОПЦнинг собиқ раҳбари Ахрор Маҳмудов уни 2017 йил октябридан бери бошқараётган эди. Spot нашрига берган интервьюсида у дастлаб давлатга тегишли бўлган Uzcard компаниясининг кейинчалик қандай хусусийлаштирилганлигини айтиб берган эди.
«Мени бош директор лавозимига тайинлашганида, асосий бошқарувчи инглиз компанияси эди. Бозор ўзгаришни бошлаганлиги сабабли, HUMO тўлов тизими кўринишида альтернатива пайдо бўлди, хорижий шериклар бозорни тарк этишга қарор қилишди. Сотиш бўйича музокараларнинг узоқ жараёни бошланди. Шунда мен компания раҳбари сифатида 75 фоиз акцияни сотиб олиш истагини билдирдим. Мен кредит бўйича маълум миқдорни олдим. Қарз юки кўпая бошлаганида, мен Uzcard даги улушимни сотишга қарор қилдим (2020 йил май ойида). Янги раҳбар (Ойбек Турусунов — таҳр.) менинг инвестиция мажбуриятларимни ўз зиммасига олди», — дея тушунтирган у.
Август ойи бошида Uzcard муассислари яна ўзгарди. Ўзмиллийбанк 51% акцияларни, Ўзсаноатқурилишбанк, Асака банк, Ипотека банк ва Алоқабанк — ҳар бири 6% дан, қолган 25% ни эса жисмоний шахслар сотиб олишган.
