Ўзбекистонда карантин чекловлари ўрнатилган даврда 1 млн сўмгача иш ҳаққи оладиганлар сони кўпайган. Бу ҳақда Молия вазирлиги мамлакатнинг 2020 йил биринчи ярим йиллик якунларига бағишлан Давлат бюджети даромадлари шарҳида маълум қилди.
Қайд этилишича, 4,16 миллион киши иш ҳақи бўйича солиқ тўлаган бўлиб, бу, ўз ўрнида, февраль ойидаги рақамларга нисбатан 2,1 фоизга, яъни 87559 кишига кам демакдир. Мазкур кўрсаткич I чоракка нисбатан қуйидаги асосий омиллар туфайли камайгани айтилди:
- апрель ойида иқтисодий фаолликнинг пасайиши натижасида хусусий секторда меҳнатга ҳақ тўлаш жамғармасининг камайиши. Бу камайиш карантин бўйича қатъий чекловлар қабул қилинган даврда, ходимларга, шу жумладан бюджет ташкилотларида таътил тўловларини бериш орқали қисман қопланди;
- 2020 йилда ходимга тўланадиган ва солиққа тортилмайдиган моддий ёрдам суммаси МҲТЭКМнинг 4,22 бараваридан 7,5 бараваригача оширилиши.
Апрель-май ойларида мамлакатда 1 млн сўмгача иш ҳақи оладиганлар сони кўпайган — 1,67 млндан 1,77 млнгача (41,6 фоиздан 42,6 фоизгача).
Шу билан бир қаторда, 5,5 млн сўм ва ундан юқори иш ҳақи оладиган фуқаролар сони ҳам ошган — 239,5 минг киши (январь-март ойларида 184,8 минг эди).
Қолган тоифадагиларнинг иш ҳақи даражаси динамикаси пасайган:
- 1 млн киши — 1 млн сўмдан 2 млн сўмгача иш ҳақи олади (январь-март ойларида 1,1 млн эди);
- 888 мингга яқин киши — 2 млн сўмдан 4 млн сўмгача иш ҳақи олади (январь-март ойларида 911 минг эди);
- 194,8 минг киши — 4 млн сўмдан 5,5 млн сўмгача иш ҳақи олади (январь-март ойларида 198 минг эди).
Жадвал: Молия вазирлиги
Эслатиб ўтамиз, шу каби рақамлар динамикаси Марказий банк ўтказган аҳоли даромадлари сўровномасида ҳам қайд этилганди. Унга кўра, коронавирус пандемияси даврида уй хўжалиги ўртача даромади 2 миллион сўмгача бўлганлар сони деярли уч бараварга кўпайди — 8 фоиздан 21 фоизгача. Даромадлари 2 миллиондан 4 миллионгача бўлган уй хўжаликлари сони 39 фоиздан 35 фоизгача, даромадлари 4 миллиондан 6 миллион сўмгача бўлганлар сони эса 31 фоиздан 22 фоизга тушди. Шу билан бирга, ўртача даромади 6 млн сўм ва ундан юқори бўлган уй хўжаликлари сони 22% дан 23% га ошди.
