АҚШ президенти Доналд Трамп мамлакатда TikTok ва Хитойнинг бошқа дастурлари ва хизматларини тақиқлашини расман эълон қилди. Агар TikTok АҚШ компанияси томонидан сотиб олинадиган бўлса, илова мамлакатда ишлашни давом эттириши мумкин ва бунда битимдан тушган маблағнинг бир қисми АҚШ Ғазнасига тушиши шарт қилиб қўйилди. Бу ҳақда Bloomberg маълумотларига таянган ҳолда TJournal хабар берди.
Трамп TikTok 15 сентябргача «Microsoft ёки бошқа жуда америкалик компания» томонидан сотиб олинса, унинг фаолият кўрсатишига розилик беришини таъкидлади. Бироқ, келишувга кўра, АҚШ Ғазнаси ҳам ҳисобга олиниши, унга «кўп пул туширилиши» керак дейилди. Агар муддатидан олдин келишувга эришилмаса, у ҳолда TikTok мамлакатда тақиқланади.
Илк бор АҚШда TikTok ни тақиқлаш ҳақида июль ойида гапира бошлашди. Кейинчалик Financial Times хизмат АҚШ савдо вазирлиги томонидан Huawei сингари қора рўйхатга олиниши кутилаётгани ҳақида хабар берди.
Аввалроқ, 31 июль куни Bloomberg ва New York Times турли манбаларга таянган ҳолда, Microsoft корпорацияси TikTok нинг АҚШдаги қисмини сотиб олиш бўйича музокаралар олиб бораётганини айтди. Шу куни Трамп мамлакатда хизматни «зудлик билан» тақиқлаши ҳақида эълон қилди.
3 августга ўтар кечаси Microsoft TikTok бизнесининг бир қисмини сотиб олиш режаларини расман тасдиқлади. Агар томонлар келишувга эришса, компания нафақат хизматнинг АҚШдаги қисмини, балки Канада, Австралия ва Янги Зеландиядаги бўлинмаларига ҳам эга бўлади.
Microsoft бош директори Сатья Наделла аллақачон Доналд Трамп билан суҳбат қилганини маълум қилди. Компания TikTok сотиб олган тақдирда барча фойдаланувчи маълумотларини АҚШга кўчиришга ва шунингдек, маълумотлар чет эл серверларидан ўчирилганлигига ишонч ҳосил қилишга ваъда қилди.
TikTok — бу Пекинда жойлашган ByteDance га тегишли бўлган қисқа видеолавҳалар яратиш ва кўриш хизмати. Икки йил олдин ушбу хизматнинг аудиторияси кунига 800 млн кишини ташкил этган, аммо TikTok фойдаланувчилар сони тўғрисида расмий маълумот бермаяпти, деб ёзади VC.ru.
Масалан, Буюк Британияда TikTok нинг фаол фойдаланувчилари сони ойига 3,7 млн дан ошади, видеолар томоша қилишнинг ўртача кўрсаткичи 5 млрд га тенг. Франциядаги фойдаланувчилар сони 4 млн дан ошади, уларнинг ҳар бири ушбу иловада кунига 40 дақиқа сарфлайди.
Ушбу хизматнинг Ўзбекистонда оммалашуви ўтган йил кузида қайд этилган эди. TikTok юклаб олишлар сони бўйича биринчи бешликка кирган эди, дея хабар беради Spot.uz. Июль ойи ўрталарига келиб, TikTok мамлакатда ҳам iOS, ҳам Android фойдаланувчилари орасида энг кўп юклаб олинган дастурга айланган.
