Асоратларсиз беморларга уйда ва меҳмонхоналарда даволанишларига рухсат берилганига қарамай, стационар шифохоналарда ётоқ-жойлар қолмади, дейди коронавирусга қарши курашиш марказининг вакили, профессор Хабибулла Оқилов чоршанба куни бўлиб ўтган брифингда.
Касалхоналар коронавирус беморларини даволаш учун қайта жиҳозланганлиги сабабли, бошқа сурункали касалликлар беморлари даволана олмай қолмоқда ва вафот этишмоқда. Ҳозирча COVID-19 нинг билвосита қурбонлари тўғрисида статистик маълумотлар мавжуд эмас, аммо бунга кўз юмиб бўлмайди, деди у.
Хабибулла Оқиловнинг таъкидлашича, агар ҳар куни COVID-19 нинг 1000 та касаллиги аниқланса, Ўзбекистон соғлиқни сақлаш тизими тўлиқ қулаши мумкин.
Бунинг олдини олиш учун қаттиқ карантин чекловларига қайтишга қарор қилинди. Бу каби чоралар коронавируснинг тарқалиш занжирини узиш учун зарур.
«Дастлаб биз иккита инкубация даврини эълон қилишни сўрадик (14 кундан — умумий 28 кун), аммо бизга одамлар учун бу жуда қийин бўлишини айтишди. Биз максимал 20 кунга бардош бера оламиз. Биз комиссияни ҳеч бўлмаганда 20 кунга кўндиришга муваффақ бўлдик. Агар биз қаттиқ чоралар кўрмасак, оқибатлари фожиали бўлиши мумкин», — дея таъкидлади профессор.
