Ўзини ўзи банд қилган шахсларни рўйхатга олиш махсус мобиль илова, яъни солиқ тўловчининг шахсий кабинети орқали амалга оширилади.
Давлат солиқ қўмитаси томонидан ишлаб чиқилган қўлланма орқали, мобиль иловани қандай юклаб олиш ва рўйхатдан ўтиш жараёни билан танишишингиз мумкин. «Газета.uz» ушбу қўлланмани тақдим этади.
Солиқ органларида ўзини ўзи банд қилган шахс сифатида рўйхатдан ўтиш учун смартфон қурилмасига Play Market орқали «Soliq» мобил иловасини юклаб олиш керак бўлади.
Маълумот учун, ушбу мобил илова фақат Android телефонлари учун мавжуд, App Store га илова юкланмаган. Лекин Солиқ қўмитаси «Газета.uz»га ушбу иловани iOS операцион тизими учун тез орада ишлаб чиқарилишини маълум қилди.
Иловани юклаб олгандан сўнг, уни очинг ва «Ўзини ўзи банд қилиш» бўлимини танланг.
Сўнг, ўзингизнинг шахсий идентификация рақамингизи (ЖШШИР-ПИНФЛ) киритинг ёки электрон рақамли имзо (ЭРИ) калити орқали шахсингизни тасдиқланг.
ЖШШИРни паспортингиздан билиб олишингиз мумкин. ЖШШИРни аниқлаш тартибини билмасангиз, «Ёрдам керакми?» бўлимига мурожаат қилишингиз мумкин.
ЖШШИРни киритганингиздан сўнг (агар сиз аввал солиқ органларида ўзини ўзи банд қилган шахс сифатида рўйхатдан ўтмаган бўлсангиз), навбатдаги «Шахсини тасдиқлаш» ойнаси очилади.
Унга телефон рақамингизни киритинг. Шундан сўнг сиз киритган телефон рақамига СМС тарзда тасдиқлаш коди юборилади.
Мобил телефонингизга келган SMS хабардаги тасдиқлаш кодини киритганингиздан сўнг, «Рўйхатдан ўтиш» тугмасини босинг.
Сиз киритган маълумотлар асосида электрон ариза шаклланади.
Агар сизнинг электрон рақамли имзо калитингиз бўлса, унда «Эри орқали рўйхатдан ўтиш»ни танланг. Бунда жараён тезроқ амалга ошади. «ЭРИ»ни олиш бўйича қўлланма.
Очилган Ариза ойнасида рўйхатдан ўтмоқчи бўлган фаолият турини танланг. Баъзи ҳолатларда, керак бўлса бир нечта хизмат (иш) турини танлаш мумкин.
Фаолият турини танлагандан сўнг рўйхатдан ўтмоқчи бўлган фаолият жойи (туман ёки шаҳар)ни танлашингиз мумкин.
Киритилган маълумотлар тўғрилигини текшириб бўлганигиздан кейин, «Рўйхатдан ўтиш»ни танланг. Шундан сўнг, ўзини ўзи банд қилган шахс сифатида рўйхатдан ўтганликни тасдиқловчи матрицали штрих кодга эга маълумотнома шаклланади.
QR кодли маълумотномани хоҳишга кўра юклаб олиб, қоғоз шаклида чиқариб олиш мумкин. Бунинг учун «Маълумотнома» ойнасидаги «Кўриш» ёки «Юклаб олиш» бўлимини танлашингиз керак бўлади.
Маълумотноманинг намунаси:
Кўрсатилган барча ҳаракатларни бажарганингиздан кейин, «ўзини ўзи банд қилган» мақомини расман рўйхатдан ўтказиш тугатилади — қонуний фаолият учун имконият фаоллашади.
«Маълумотнома» ойнасида рўйхатдан ўтиш билан бирга 2020 йил учун ижтимоий солиқни базавий ҳисоблаш миқдорининг камида 50 фоизи ҳажмида (111 500 сўм) тўлаш имкони мавжуд. Бунинг учун тегишли саволнинг «Ҳа» бўлимини танлаш ва пайдо бўлган ойнадаги сўров бўйича пластик карта рақами ҳамда муддатини киритиш лозим.
Ижтимоий солиқни ихтиёрий электрон тўлов тизими орқали амалга ошириш мумкин.
