Ўзбекистондаги футбол клубларни хусусий секторга ўтказиш ва футбол соҳасини бозор механизмлари асосида бошқариш тавсия қилинмоқда. Бу ҳақда Вазирлар маҳкамаси тегишли қарорни қабул қилди.
Унга кўра, Ўзбекистонда болалар ва ўсмирлар ўртасида футбол билан шуғулланишга қизиқишини ошириш ва ҳаваскор футболни оммалаштириш мақсадида юқори иқтидорга эга бўлган ёш футболчиларни танлаш ва саралаб олиш (селекция) тизимини ташкил этиш, футбол соҳасига хусусий инвестицияларни кенг жалб этиш ҳамда футбол клубларини хусусий секторга ўтказиш мамлакатдаги ҳудудий футбол ассоциацияларининг асосий ривожланиш йўналишлари сифатида тавсия этилди.
Шунингдек, Қорақалпоғистон Вазирлар Кенгаши, вилоятлар ва Тошкент шаҳар ҳокимликлари томонидан ҳудудий футбол ассоциациялари фаолияти Қорақалпоғистон Республикаси бюджетининг, вилоятлар ва Тошкент шаҳар маҳаллий бюджетларининг қўшимча даромадлари ҳисобидан молиялаштирилиши маълум қилинди.
Қарорга кўра, ФИФА талабларига мувофиқ, Ўзбекистон футбол ассоциацияси томонидан футбол бўйича агентлар (воситачилар) фаолиятини тартибга солиш ва уларни аккредитациядан ўтказиш тартиби амалиётга жорий этилади.
Бундан ташқари, Республика бўйлаб тегишли ҳудудда профессионал футболни ривожлантириш учун зарур шарт-шароитлар яратилади, жумладан, ҳар бир тумандан (шаҳардан) ҳудудий биринчиликларда иштирок этувчи камида битта футбол жамоаси ва ўтказиладиган мусобақаларга мос равишда марказий стадион бўлиши таъминланади.
