Қорақалпоғистоннинг Тахиатош туманидаги иссиқлик электр станциясининг иккита энергоблоки пайшанба куни электр узатиш тармоқларида рўй берган муаммолар сабабли ўчирилди. Бу ҳақда Тахиатош ИЭСдан «Газета.uz"га хабар қилинди.
Энергоблоклар фаолияти тўхтагани сабабли Хоразм вилояти ва Қорақалпоғистоннинг бир қанча туманларида электр таъминоти ўчирилди.
«Буни авария деб бўлмайди, бу ўчириш. Ҳозирда улаш бўйича ишлар олиб борилмоқда. Иккита блок ишга туширилди, техник жараёнлар амалга оширилмоқда. 10:43 да ўчирилган эди. Сабаблари аниқланмоқда. Эҳтимол, электр узатиш тармоқлари сабабли, уларга Хоразм вилояти ва Қорақалпоғистон уланган. Улаш бўйича ишлар қачон тугаши номаълум. Бу техника, олдиндан бир нарса деб бўлмайди», — дея таъкидлади ИЭС вакили.
Энергетика вазирлигидан қайд этилишича, биринчи блок техник тозалаш тизимлари ишга тушганидан сўнг тўхтаган. Орадан 12 сония ўтиб иккинчи блокда ва турбоагрегатда (турбогенераторлар сони жами 3 та) ҳам ҳимоя тизими ишга тушган.
10:59 да турбоагрегат ишлашни бошлаган. Иккита энергоблокни улаш бўйича ишлар давом эттирилмоқда, дея хабар қилди Энергетика вазирлиги вакили.
Ноябрда General Electric компанияси Тахиатош иссиқлик электр станциясини модернизация қилиш учун ускуналарнинг биринчи партиясини етказиб беришни якунлаган эди. Ушбу ускуналар модернизация учун мўлжалланган янги блокларнинг иккита газ турбинаси ва иккита генераторидан иборат. Мазкур лойиҳа GE ҳамда Жанубий Кореянинг Hyundai Engineering ва Hyundai Engineering and Construction компаниялари консорциуми томонидан амалга оширилмоқда.
Бугунги кунда Тахиатош ИЭСнинг белгиланган қуввати 730 МВтни ташкил этади. Биринчи энергоблок 1956 йилда, сўнгиси (бешинчиси) эса 1990 йилда ишга туширилган.
