Душанбага ўтар кечаси Тошкент вилоятида содир бўлган автобус авариясида 27 киши жароҳат олди, дея хабар қилди Ўзбекистон Соғлиқни сақлаш вазирлиги. Аввалроқ 7 кишининг жароҳат олгани хабар қилинган эди.
Йўл-транспорт ҳодисаси 1:44 да 4Р20 автомобиль йўлининг Ўртачирчиқ тумани ҳудудидан ўтган 6- километрида содир бўлди. Шинаси ёрилиши натижасида Бухородан келаётган Mercedes-Benz автобуси ағдарилиб кетган.
Машинада53 киши, жумладан 3 нафар ҳайдовчи бўлган. ФВВ маълумотларига кўра, йўловчиларнинг 37 нафари Паркент туманидаги 31-мактабнинг ўқувчилари, 3 нафари мактаб ўқитувчилари ва 10 нафари ота-оналардан бўлган.
Барча жабрланганларга тез тиббий ёрдам кўрсатилган. Улардан 19 нафарига амбулатор ёрдам кўрсатилиб, уйига рухсат берилган. Икки жабрланувчи Нурафшон тиббиёт бирлашмасида чуқурлаштирилган тиббий кўрикдан ўтказилгандан кейин уйига рухсат берилган.
Олти нафар жабрланувчи Тошкентдаги Республика шошилинч ёрдам илмий марказига етказилган. Улардан икки нафари — А. Қобилов (54 ёш) ва Р. Маъмурбоева (2,5 ёш) — муваффақиятли опрация қилинган. Айни вақтда улар ўзини яхши ҳис этмоқда, дея қайд этди ССВ.
Тиббий ходимлар автобусда бўлганларнинг барчасининг уйларида бўлиб, тиббий кўрик ўтказган. Барча беморлар Соғлиқни сақлаш вазирлиги назорати остида.
