29 апрель куни 2:00 да Тошкент вилоятининг Ўртачирчиқ тумани ҳудудида Бухородан келаётган Mercedes-Benz русумли автобус (давлат раҳқами 11 366 СВА) ағдарилиб кетди.
Ўзбекистон ФВВ матбуот хизматининг хабар қилишича, ҳодисага шинанинг ёрилиб кетиши сабаб бўлган. Ағдарилганидан сўнг автобусда ёнғин бошланган.
Салонда 53 киши, жумладан 3 нафар ҳайдовчи бўлган. Йўловчилар орасида Паркент туманидаги 31- умумтаълим мактабининг 37 ўқувчиси, 3 педагог ва 10 нафар ота-она бўлган.
Барча йўловчилар тезкорлик билан эвакуация қилинган. Жабрланганларга ҳодиса жойида тиббий ёрдам кўрсатилган. Етти киши турли даражада тан жароҳати олди, уларнинг икки нафари Ўртачирчиқ туман шифохонасига, беш нафари Республика шошилинч ёрдам илмий марказига жойлаштирилди.
