1 июлдан бошлаб Ўзбекистон билан Европа Иттифоқи ўртасида шериклик ва ҳамкорлик тўғрисидаги Битимга 2011 йил 7 апрелда имзоланган «Тўқимачилик баённомаси» кучга кирди. Бу ҳақда Ўзбекистон ТИВ матбуот хизмати хабар қилди.
«Мамлакатимизда тўқимачилик соҳасини ривожлантиришга муҳим эътибор берилаётганини ҳисобга олган ҳолда, ушбу ҳужжатнинг кучга кириши мамлакатимизнинг экспорт салоҳиятни оширишда ва миллий тўқимачилик маҳсулотларимизнинг Европа бозорларига кириб боришида катта амалий аҳамиятга эга», — дейилади хабарда.
«Хусусан, ушбу ҳужжат Ўзбекистон билан Европа Иттифоқи ўртасида тўқимачилик маҳсулотлари савдоси учун мустаҳкам ҳуқуқий асос яратади. Бунда транзит ташишда, Европа Иттифоқи томонидан Ўзбекистон тўқимачилик маҳсулотларига қўлланилаётган божхона ва солиқ тўловларига нисбатан ўзаролик асосида энг қулай режимни йўлга қўйиш ҳамда ушбу турдаги маҳсулотлар савдосидаги миқдорий чекловларни олиб ташлаш назарда тутилади», — деб аниқлик киритди ТИВ.
