Берлинда «Норманд тўртлиги» музокаралари
Берлинда Германия, Россия, Украина ва Франция раҳбарлари иштирокида «Норманд тўртлиги» музокаралари бўлиб ўтди. Учрашув уч соатдан зиёдроқ давом этди. Қатнашчилар Украина жануби шарқидаги вазиятни ўнглашда Минск шартномасига таяниш лозимлигини тасдиқлаб, мазкур битим шартларини адо этишга тайёрлигини билдирди. «Тўртлик» ЕХҲТнинг Донбассдаги миссиясини кенгайтиришга шайлигини тасдиқлади. Бунда гап оғир техникани олиб чиқиш ва сақлаш зоналари ҳақида ҳам кетмоқда. Музокаралар қатнашчилари Украина бўйича гуманитар мазмундаги масалаларнинг бир қисмигагина ойдинлик киритишга муваффақ бўлишди. [РИА Новости]
ИШИД жангарилари Ироқнинг Мосул шаҳрини тарк этишни бошлади
«Ислом давлати» террористик гуруҳи жангарилари душанба куни кенг миқёсли озод қилиш операциялари бошланганидан сўнг Ироқнинг Мосул шаҳрини тарк этишни бошлади. ОАВ маълумотларига кўра, энг камида 100 нафар тўдабоши Сурия томонга отланган. Мосул 2014 йилдан буён ИШИДнинг асосий таянч марказларидан бири бўлиб қолмоқда. Шаҳарга Ироқ ҳарбий ва полиция кучлари, шунингдек, курд тузилмалари АҚШ бошчилигидаги коалиция ёрдамида кенг миқёсда ҳужум уюштирмоқда. [РИА Новости]
Жулиан Ассанж интернетдан узиб қўйилди
Эквадор ҳукумати 2012 йилдан буён WikiLeaks портали асосчиси Жулиан Ассанж яшириниб келаётган Лондондаги элчихонасида интернетни ўчирди. Сўнгги кунларда WikiLeaks АҚШ президентлигига номзод Ҳиллари Клинтон сайлов штаби раҳбари Жон Подестнинг мактубларини эркин фойдаланишга эълон қилган эди. [РИА Новости]
Олимлар ЕxoМars миссиясининг Schiaparelli модули сигналларини кутмоқда
Еврокенгаш ва Россиянинг Марсда ҳаёт аломатларини излаш бўйича ҳамкорликдаги ЕxoМars-2016 лойиҳаси мутахассислари қизил сайёра сатҳига қўниши лозим бўлган Schiaparelli модулидан сигнал келишини кутмоқда. Қўниш вақтида модуль парашютнинг очилиши ва иссиқлик экранининг ташлаб юборилиши ҳақида сигнал юбора олар эди. Бироқ энг паст баландликка етганда сигнал йўқолди. Миссия вазифаси — сайёра атмосферасида метан гази мавжудлигини исботлашдан иборат. Бу эса ўтмишдаги ёки айни пайтдаги Марсда ҳаёт аломатлари мавжудлигини тасдиқлайди ва 2020 йилга мўлжалланган ExoMars экспедициясининг кейинги босқичидаги асосий технологик тайёргарликларни ҳам белгилаб беради. [РИА Новости]
Tesla`нинг янги автомобиллари автопилот билан жиҳозланади
Tesla томонидан ишлаб чиқариладиган барча автомобиллар, шу жумладан, Model 3 ҳам тўлиқ автомат бошқарув учун жиҳозлар билан таъминланади, хабар қилди компания. Электрокарлар ишлаб чиқарувчиси мурожаатида келтирилишича, бунда машиналар хавфсизлиги инсон таъминлаши мумкин бўлгандан анча юқори бўлади. Автомобиллар 360 даражали кўриш имкониятига эга камералар, қаттиқ ва юмшоқ объектларни аниқловчи янгича ультратовуш датчиклари, ҳар қандай об-ҳавода ҳам мавжуд вазият ҳақида маълумотлар олувчи радарлар билан таъминланади. [Tesla]
