24-may kuni E-auksion platformasida Xalq banki bosh ofisi joylashgan binolar majmuasini sotish bo‘yicha auksion savdosi yakunlandi, deb e’tibor qaratdi Spot.
Auksion savdosi 15 daqiqa davom etdi. Yagona taklif 119,71 milliard so‘m (9,5 million dollar) narx bilan Oazis Samarkand tomonidan taqdim etildi, bu boshlang‘ich bahodan 5 foizga ko‘p yoki kvadrat metr uchun 12,9 million so‘m degani.
Ma’muriy va yordamchi binolar Toshkent shahrining Chilonzor tumani Qatortol ko‘chasidagi shu nomdagi savdo majmuasi yonidagi 0,5 gektar maydonda joylashgan. Mulk aksiyadorning qaroriga ko‘ra yil boshida auksion savdosiga qo‘yilgandi.
Majmua uchta ofis binosidan iborat — olti, besh va ikki qavatli. Binoning umumiy maydoni 9242 kv. metr, foydalaniladigani — 7049 kv. metr.
Elektr va suv ta’minoti, shuningdek, kanalizatsiya bor, lekin gaz yo‘q. Lotning narxiga QQS va tomdagi umumiy quvvati 50 kVt bo‘lgan fotoelektrik panellar kiradi.
Xaridor binolar qiymatining kamida 25 foizini dastlabki to‘lov sifatida amalga oshirishi, qolgan qismini esa uch yil davomida bo‘lib to‘lashi shart. Shundan keyingina mulk huquqi xaridorga o‘tadi. Sotuvchi mulk sotilgandan keyin bir oy ichida binolarni bo‘shatishi kerak. Xalq banki bosh ofisining yangi joylashuvi hali e’lon qilinmagan.
Korxonalar va tashkilotlarning yagona davlat registri ma’lumotlariga ko‘ra, Oazis Samarkand 2013-yil fevral oyida ro‘yxatdan o‘tgan bo‘lib, asosiy faoliyat yo‘nalishi restoran va oziq-ovqat yetkazib berish xizmatlari hisoblanadi. Amir Dilshodovich Dalerov yagona ta’sischi sifatida qayd etilgan. Shu bilan birga, 29-aprel kuni muassislar safiga Xursheda tibbiyot va tashxiz kompaniyasi ham qo‘shilgan.
Amir Dalerov, shuningdek, Sidi Med kompaniyasi (Zarmed diagnostika markazi), Samarkand-Zarmed Universiteti va New Techno Age ta’lim muassasasida ham ulushlarga ega.
