Kriptoaktivlar aylanmasi sohasida tartibga soluvchi organ hisoblangan Istiqbolli loyihalar milliy agentligi xalqaro kriptobirjalar, shu jumladan, Binance kriptobirjasi faoliyatini kriptoaktivlar aylanmasi sohasidagi litsenziyalash talablari va shartlariga muvofiqligini tekshirdi, deb xabar berdi ILMA matbuot xizmati.
Tekshiruv davomida quyidagi qonun buzilish holatlari aniqlandi:
- O‘zbekiston fuqarolariga kriptoaktivlar bilan bog‘liq operatsiyalar bo‘yicha xizmatlar ko‘rsatilgani haqida tasdiqlangan faktlar mavjud;
- Binance platformasida operatsiyalar anonim kriptoaktivlar, shuningdek, jinoiy yo‘l (o‘g‘irlik, firibgarlik va boshqalar) orqali olingan kriptoaktivlar va mablag‘lar bilan amalga oshiriladi;
- kompaniya yuridik shaxs — O‘zbekiston rezidenti emas;
- O‘zbekistonda joylashgan serverlarda elektron platforma mavjud emas;
- kriptoaktivlar aylanmasi sohasidagi, shuningdek, jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurollarini tarqatishni moliyalashtirishga qarshi kurashish, shuningdek shaxsiy ma’lumotlarni saqlash va ulardan foydalanish sohasidagi qonun hujjatlarining talablariga rioya etilmagan;
- xizmat provayderlarining ustav jamg‘armasidan terrorchilik faoliyati bilan shug‘ullanishi mumkin bo‘lgan yoki iqtisodiy jinoyatlar, jinoiy daromadlarni legallashtirish, uyushgan jinoyatchilik, narkotik moddalarning noqonuniy aylanishi va korrupsiya uchun sudlanganligi o‘talmagan shaxslar, shuningdek, offshor hududlarda ro‘yxatdan o‘tgan kompaniyalar chetlatilgani to‘g‘risida ma’lumotlar yo‘q;
- bir qismi O‘zbekiston tijorat bankida alohida hisobvaraqda saqlanishi zarur bo‘lgan ustav jamg‘armasi mavjud emas.
Tekshiruv natijalariga ko‘ra, ILMA bayonnoma tuzib, uni ko‘rib chiqish va qoidabuzarliklarni bartaraf etish choralarini ko‘rish uchun Binance kriptobirjasiga yubordi. Biroq, xabarda aytilishicha, Binance tegishli choralarni ko‘rmagan va O‘zbekiston hududida xizmat ko‘rsatuvchi provayder litsenziyasini olmagan.
Shu munosabat bilan agentlik Binance kriptobirjasi va kompaniya ro‘yxatdan o‘tgan yurisdiksiya regulyatoriga BHMning 300 baravari (102 million so‘m yoki taxminan 8300 dollar) miqdorida jarima solish bo‘yicha qaror qabul qildi.
Huquqbuzar ushbu jarimani bir oy ichida ixtiyoriy ravishda to‘lashi mumkin, aks holda vakolatli organ jarimani undirish uchun sudga ariza beradi.
ILMAning ta’kidlashicha, O‘zbekiston qonunchiligida litsenziyasiz faoliyat bilan shug‘ullanganlik uchun ma’muriy va jinoiy javobgarlik choralari belgilangan.
Agentlik, shuningdek, qonunchilikka muvofiq, O‘zbekiston fuqarolari va yuridik shaxslari kriptoaktivlarni sotib olish, sotish va ayirboshlash bo‘yicha operatsiyalarni faqat milliy provayderlar orqali amalga oshirishi mumkinligini bildirib o‘tdi.
Eslatib o‘tamiz, Bloomberg 2023-yil dekabrida AQSh Adliya vazirligi va Ichki daromadlar xizmati Binance`ga nisbatan tekshiruv boshlagani haqida xabar bergan edi. Jinoiy faoliyat bilan bog‘liq mablag‘lar boshqa kriptobirjalarga qaraganda ko‘proq Binance orqali o‘tgan deb ishoniladi.
Binance savdo hajmi bo‘yicha ilk va eng yirik kriptovalyuta birjalaridan biridir. Platforma 2017-yilda tashkil etilgan va Kayman orollarida ro‘yxatdan o‘tgan.
