Parij sudi Suriya prezidenti Bashar Asadni 2013-yilda kimyoviy qurol qo‘llash bilan bog‘liq insoniyatga qarshi jinoyatlarda ayblanib, hibsga olishga xalqaro order berdi, deb yozmoqda Le Monde.
Gap 2013-yil 21-avgust kuni Damashq yaqinidagi Sharqiy Gutada zarin gazidan foydalangan holda uyushtirilgan hujum haqida ketmoqda, AQSh ma’lumotlariga ko‘ra, o‘shanda 1400 dan ortiq odam halok bo‘lgan. Hujum Suriyadagi fuqarolar urushi, Asad rejimi hukumat kuchlari va muxolifat o‘rtasidagi mojaro boshlanganidan ikki yil o‘tib amalga oshirilgan.
Asaddan tashqari uning ukasi, Suriya Respublika gvardiyasi qo‘mondoni Maher Asad va ikki generalga ham ayblovlar qo‘yilgan. Ular ham insoniyatga qarshi jinoyatlarda gumon qilinmoqda.
Nashrning qayd etishicha, Parij sudi departamenti Suriyadagi kimyoviy hujumlarni 2021-yildan beri tekshirib kelmoqda. Tergov Suriya OAV va so‘z erkinligi markazi (SCM), Ochiq jamiyat adolat tashabbusi (OSJI) va Suriyadagi inson huquqlari buzilishini hujjatlashtirgan Suriya arxivi shikoyati ortidan o‘tkazilgan.
“Bu muhim qadam, — deya iqtibos keltiradi Le Figaro SCM asoschisi Mazen Darvish so‘zlaridan. — Mustaqil yurisdiksiya Suriya prezidenti javobgar va buning uchun javob berishi kerakligini bilmagan holda kimyoviy hujum sodir bo‘lishi mumkin emasligini tan oladi”. Uning so‘zlariga ko‘ra, o‘z ko‘zlari bilan ko‘rgan guvohlar va Suriya qurolli kuchlarini nazorat qilish tizimining chuqur tahlili Bashar Asadga qo‘yilgan ayblovlarni tasdiqlaydi.
