Surxondaryo viloyati Sherobod tumanidagi 4 ta arxeologiya yodgorligiga 7 mlrd so‘mlik zarar yetkazilgani aniqlandi. Bu haqda Bosh prokuratura matbuot xizmati xabar qildi.
Xususan, miloddan avvalgi V-I asrlarga oid “Tallagan tepa” yodgorligining 40 m² qismi kesib olingan. Avtomobil yo‘li o‘tkazilishi oqibatida 888 mln so‘mlik zarar yetkazilgan.
V-VIII asrlarga oid “G‘o‘rintepa” yodgorligining 200 m² qismi buzilib ketgan, uy-joylar qurib yuborilishi oqibatida 4,7 mlrd so‘mlik zarar ko‘rilgan.
I-IV asrlarga oid “Xushvaqtepa” yodgorligining esa 12 m² qismi kesib olingan, hojatxona qurilganligi oqibatida yodgorlik 266 mln so‘mlik zarar ko‘rgan.
V-VII asrlarga oid “Toshtepa” yodgorligining 56 m² tuproqlari kesib olinib, molxona qurilgani oqibatida 1,2 mlrd so‘mlik zarar aniqlangan.
Holatlar yuzasidan tuman hokimligi mansabdor shaxslari va boshqalarga nisbatan jinoyat ishi qo‘zg‘atildi. Dastlabki tergov harakatlari ketmoqda, deyiladi xabarda.
