1-noyabr kuni O‘zbekiston musulmonlari idorasi huzuridagi “Vaqf” xayriya jamoat fondi boshqaruvi a’zolarining yig‘ilishi bo‘lib o‘tdi, deya xabar bermoqda idora matbuot xizmati.
Yig‘ilishda fondning xayriya aksiyalarini ommalashtirish maqsadida mehr-muruvvat ishlarini uyushtirgan, nogiron bolalarga yordam beruvchi “Yurak amri” loyihasiga boshchilik qilgan Sardor Rahimxon (Sanjar Rahimov) fond rahbari o‘rinbosari — “Vaqf” xayriya ishlari bo‘yicha direktor lavozimiga tayinlangani e’lon qilindi.
Uning loyihasi 2020-yilda O‘zbekistonda boshlangan pandemiya davrida kam ta’minlangan, ehtiyojmand oilalarga oziq-ovqat tarqatish uchun tashkil topgan. 2022-yilning aprel oyida fond “Jannatdagi qasrlar 25+” loyihasi orqali 30 ta xonadon qurib, muhtojlarga topshirgan.
May oyiga kelib xayriya fondi vaqtincha yopilgan. O‘shanda Sardor Rahimxon qaror ortidan xatolarni isloh qilib, rasmiy faoliyatga tayyorgarlik ko‘rish maqsad qilinganini ta’kidlagandi.
