10-oktabr kuni 01 777 RRR avtomobil raqami kimoshdi savdosida 893,97 mln so‘mga (Markaziy bankning o‘sha kundagi kursi bo‘yicha 73,27 ming AQSh dollari) sotildi. Bu haqda “Gazeta.uz”ga O‘zbekiston Respublika tovar-xom ashyo birjasi matbuot xizmati xabar berdi.
Kim oshdi savdosi boshlanganidan so‘ng lot narxi boshlang‘ich 297 mln so‘mdan 3 baravarga oshdi. Bu esa uni O‘zbekistondagi yuridik shaxslar uchun eng qimmat “chiroyli” davlat raqamiga aylantirdi.
Bir yarim soat davom etgan onlayn-auksionda ikki nafar ishtirokchi qatnashdi. Ular jami 49 ta narx taklifini taqdim etdi.
Davlat raqamining yangi egasi 30 kun ichida uni YHXXdan ro‘yxatdan o‘tkazishi kerak.
2022-yil may oyida yuridik shaxslar uchun 50 777 ZZZ davlat raqami 669 mln so‘mga sotilgan edi.
