Prezident Shavkat Mirziyoyev Birlashgan Millatlar Tashkiloti Bosh Assambleyasining 78-sessiyasi tadbirlarida ishtirok etish uchun 17-sentabrga o‘tar kechasi Nyu-York shahriga bordi.
Davlat rahbari matbuot xizmatining xabar qilishicha, aeroportda uni Nyu-York shahri meri Erik Adams, AQSh-O‘zbekiston savdo palatasi raisi Kerolin Lemm va boshqa rasmiy shaxslar kutib oldi.
Shavkat Mirziyoyev 19-sentabr kuni BMT Bosh Assambleyasi yalpi sessiyasining umumiy munozaralarida nutq so‘zlaydi hamda “mintaqaviy va global kun tartibidagi dolzarb masalalar” yuzasidan o‘z nuqtai-nazarini bayon qiladi.
Yilning bosh xalqaro siyosiy tadbiri doirasida Markaziy Osiyo mamlakatlari va Amerika Qo‘shma Shtatlari yetakchilari sammiti (“S5+1” formati), xorijiy davlatlar, nufuzli xalqaro tashkilotlar va AQShning yetakchi kompaniyalari rahbarlari bilan qator ikki tomonlama uchrashuvlar ham bo‘lib o‘tadi.
Eslatib o‘tamiz, Shavkat Mirziyoyev prezidentlikka saylanganidan keyingi yil — 2017-yil sentabr oyida BMT Bosh Assambleyasi sessiyasida nutq so‘zlagandi. U o‘z ma’ruzasida O‘zbekistonning yangi qiyofasini shakllantirish, tashqi siyosatning ustuvor yo‘nalishlari va terrorizmga qarshi kurash usullarini qayta ko‘rib chiqish zarurligi haqida gapirgan.
Prezident BMT Bosh Assambleyasining 2020-yilda koronavirus pandemiyasi tufayli ilk bor onlayn tarzda o‘tkazilgan 75-sessiyasida ham ishtirok etgan.
