Ravnaq-bank xususiy banki o‘z nomini Octobank deb o‘zgartirdi. Bunday qaror aksiyadorlar tomonidan 30-avgust kuni bo‘lib o‘tgan yig‘ilishda qabul qilindi.
2021-yildan buyon bank aksiyalarining 52,1 foiziga egalik qilgan tadbirkor Sarvar Fayziyev ularni avgust oyi boshida boshqaruv raisi Iskandar Tursunovga sotdi, natijada uning ulushi 19,9 foizdan 72,05 foizga oshdi. Bitim 52,2 mlrd so‘mga baholandi. Qolgan aksiyalar Fortis Reserve System, Sharq Guzar Servis va boshqalarga tegishli.
Bundan tashqari, aksiyadorlar Ulug‘bek Muslimov, Taxmina Zokirova, Najmiddinxo‘ja Sharipov, Shuhrat Po‘latov va Aziz Ahrarovni o‘z ichiga olgan bank kuzatuv kengashi tarkibini yangilash uchun ovoz berishdi, shuningdek, 300 mlrd so‘mlik qo‘shimcha aksiyalarni joylashtirish huquqini belgilashdi.
2022-yil yakuni bo‘yicha bank 8,54 mlrd so‘m, 2023-yilning birinchi yarmida esa 3,46 mlrd so‘m zarar ko‘rgan.
Bundan tashqari, 1-avgust holatiga ko‘ra, kreditlarning 80,5 foizi (263 mlrd so‘mdan 212 mlrd so‘m) muammoli deb hisoblanadi. Bu banklar orasida “O‘zagroeksportbank”dan (yaqinda Olimjon Shodiyev kompaniyasi tomonidan sotib olinib, nomini “AVO Bank etib o‘zgartirilgan) keyingi ikkinchi eng yomon ko‘rsatkich bo‘lib, kredit hajmi atigi 0,4 mlrd so‘mni tashkil etadi.
Ravnaq-bank 2001-yil iyun oyida tashkil etilgan. Bank biznes-rejasida biznesning uchta strategik yo‘nalishi belgilangan: korporativ, tijorat va chakana. Asosiy e’tibor zarur mijozlar bazasini yaratish va barqaror daromad manbalarini ta’minlash uchun tezkor va arzon yo‘nalishlar uchun asos sifatida korporativ va tijorat biznesini rivojlantirishga qaratilmoqda, deb yozmoqda Spot.
Eslatib o‘tamiz, bankning yangi nomi Octo to‘lov xizmati nomiga mos keladi, Ravnaq-bank avvalroq Octo Shop bulutli platformasini ishga tushirgan edi.
