O‘zbekistonda avgust oyining dastlabki besh kunligida maksimal havo harorati +35…+40 daraja atrofida bo‘ladi, so‘ngra harorat foni +33…+38 darajagacha pasayadi. Bu bo‘yicha O‘zgidromet e’lon qilgan oylik prognozda so‘z borgan.
Dunyoning yetakchi prognostik markazlari hisob-kitoblarini jalb qilgan holda, O‘zgidromet tomonidan tuzilgan dastlabki baholash bo‘yicha ushbu yilning avgust oyi o‘rtacha issiq bo‘ladi.
Ilk 5 kunlikdan so‘ng avgust oyi o‘rtacha ko‘p yillik qiymatlarga yaqin bo‘lishi kutilmoqda.
Kunduz kunlari harorat asosan +33…+38 daraja atrofida, ayrim kunlarda 40 darajagacha bo‘lishi kutilmoqda. Oyning ikkinchi yarmida harorat +30…+33 darajagacha qisqa muddatli davrga pasayishi mumkin.
Faqat respublikaning ayrim, asosan, tog‘oldi va tog‘li hududlarida qisqa muddatli yomg‘ir yog‘ishi kutilmoqda.
Avgust oyi kuzatuvlar tarixida
O‘zbekistonda avgust oyining o‘rtacha oylik harorati iyul oyining o‘rtacha oylik haroratidan 1,5−2,5 darajaga past, ammo baribir bu juda issiq oydir.
Issiq ob-havo cho‘qqisida havo harorati +40…+43 darajaga, shimolda, janubda va cho‘l hududlarida esa +44…+47 darajaga yetadi.
Shunday qilib, Toshkentda barcha kuzatuv yillari uchun avgust oyida maksimal harorat +43,1 darajani tashkil etadi, bu holat 1944-yil 8-avgustda qayd etilgan. Ushbu qiymatga yaqin bo‘lgan maksimal harorat 2011-yil avgust oyida kuzatilgan (43 daraja) edi.
O‘zbekistonda barcha kuzatuv yillari uchun 2021-yilning avgust oyi eng issiq bo‘lib, bunda o‘rtacha oylik harorat me’yordan 1,5−2,5 darajaga yuqori bo‘ldi. Biroq 2021-yil avgust oyida ekstremal yuqori harorat kuzatilmadi. Toshkentda maksimal havo harorati +40 daraja belgisidan bir marta bo‘lsa ham yuqoriga ko‘tarilmadi.
Iyul bilan taqqoslaganda, odatda avgust oyida salqin havo kirib kelishi soni ko‘payadi, shuning uchun avgust oyida havo harorati +40 daraja va undan yuqori bo‘lgan davrlar qisqa muddatli bo‘lib, hududning ko‘p qismida 2−3 kundan ko‘p bo‘lmaydi.
Avgust — yilning eng quruq oyidir. Yomg‘irlar ko‘pincha tog‘oldi va tog‘li hududlarda kuzatiladi. Respublikaning tekislik hududlariga yomg‘ir har yili yog‘maydi va yomg‘ir kuzatilganda esa mahalliy xususiyatga ega bo‘ladi.
