Better Cotton kompaniyasi O‘zbekistondagi asosiy manfaatdor tomonlar bilan mamlakatning paxtachilik sohasini yanada yaxshilash uchun Barqaror rivojlanish yo‘l xaritasini ishlab chiqdi va imzoladi. Bu haqda kompaniya matbuot xizmati xabar qildi.
Toshkentda o‘tgan “To‘qimachilik haftaligi” doirasida o‘tkazilgan tadbirda O‘zbekiston Oliy Majlisi Senati raisi, Odam savdosiga va majburiy mehnatga qarshi kurashish bo‘yicha Milliy komissiya raisi Tanzila Narbayeva hamda O‘zbekiston “O‘zto‘qimachiliksanoat” uyushmasi raisi Ilhom Haydarov ham qatnashdi.
Unda Better Cotton kompaniyasining katta dastur menejeri Reychel Bekket biznes, hukumat, fuqarolik jamiyati, xalqaro tashkilotlar va ta’lim institutlari vakillarini o‘z ichiga olgan 600 dan ortiq delegat auditoriyasiga yo‘l xaritasini taqdim etdi.
Milliy manfaatdor tomonlar, jumladan, Qishloq xo‘jaligi vazirligi, Bandlik vazirligi, “O‘zto‘qimachiliksanoat” uyushmasi va boshqalar yo‘l xaritasi maqsadlarini ilgari surish va qo‘llab-quvvatlash majburiyatini oldi.
Yo‘l xaritasi to‘rtta asosiy maqsad bo‘yicha batafsil harakatlar rejasini samarali tarzda ishlab chiqdi.
Maqsadlar quyidagilardan iborat:
- O‘zbekistonda Better Cotton dasturini boshqarishning samarali tizimlarini yaratish va mamlakatdagi paxtadan manfaatdor tomonlarning barqarorlik asoslari haqida xabardorligini oshirish;
- munosib, xavfsiz va sog‘lom mehnat sharoitlarini, ish beruvchi va ishchi munosabatlarini samarali boshqarish hamda samarali ijtimoiy muloqotni ta’minlaydigan mehnat tizimini joriy etish orqali paxtachilik sohasi xodimlarining mehnat huquqlarini rag‘batlantirish;
- asosiy manfaatdor tomonlarning paxta yetishtirishda ekologik barqarorlikka oid ilg‘or tajribalar va ularni ekin maydoni darajasida qanday baholash mumkinligi haqida xabardorligini oshirish;
- Better Cotton dasturini boshqarish, moliyalashtirish va keng miqyosda yetkazib berish usullarini belgilovchi uch yillik strategiyani ishlab chiqish.
“Better Cotton O‘zbekistondagi o‘z ishini atrof-muhit, ishlab chiqaruvchilar va mamlakat paxta sektoridagi ishchilar uchun qiymat yaratish va yaxshilash imkoniyati sifatida ko‘radi hamda bizni butun paxta barqarorroq bo‘lgan dunyo haqidagi tasavvurimizga yaqinlashtiradi” — dedi Better Cotton kompaniyasining katta dastur menejeri Reychel Bekket.
Yo‘l xaritasi yondashuvi Better Cotton kompaniyasining O‘zbekiston bo‘ylab paxta yetishtiruvchi jamoalar atrof-muhit, jamiyatlar va iqtisodiyot uchun foydaliroq bo‘lgan barqarorroq amaliyotlarni qanday qabul qilishi mumkinligi haqidagi tavsiyalarini o‘z ichiga oladi.
“Better Cotton kompaniyasi bilan hamkorligimiz paxta dalalarida samarali boshqaruv tizimini yaratishga yordam beradi, zamonaviy, energiya tejovchi texnologiyalarni kengroq qo‘llashni rag‘batlantiradi va ishlab chiqarishning atrof-muhitga ta’sirini kamaytiradi, deb ishonamiz. Mazkur „yo‘l xaritasi“ aholini ijtimoiy muhofaza qilishni kuchaytirish, mehnat munosabatlarini xalqaro standartlar asosida takomillashtirish, mehnatkashlar uchun munosib va xavfsiz mehnat sharoitlarini yaratishga xizmat qilmoqda”, — dedi Tanzila Narbayeva.
