Aziz Abduhakimov ekologiya, atrof-muhitni muhofaza qilish va iqlim o‘zgarishi vaziri lavozimiga ma’qullandi. Bu haqda Qonunchilik palatasi axborot xizmati xabar berdi.
Prezidentning “Ekologiya va atrof-muhitni muhofaza qilish sohasini transformatsiya qilish va vakolatli davlat organi faoliyatini tashkil etish chora-tadbirlari to‘g‘risida”gi farmoni bilan Tabiat resurslari vazirligi Ekologiya, atrof-muhitni muhofaza qilish va iqlim o‘zgarishi vazirligi deb qayta nomlangandi.
Qonunchilik palatasining navbatdagi majlisida deputatlar vazir lavozimiga Aziz Abduhakimov nomzodini ko‘rib chiqdi. Deputatlar uning nomzodini ma’qulladi.
Eslatib o‘tamiz, 2023-yil 1-yanvardan O‘zbekistonda vazirliklar soni 25 tadan 21 taga qisqartirilgandi. Xususan, Ekologiya va atrof-muhitni muhofaza qilish qo‘mitasi, Gidrometrologiya xizmati hamda O‘rmon xo‘jaligi davlat qo‘mitasi birlashtirilib, Tabiat resurslari vazirligi tashkil etilgandi. Unga Aziz Abduhakimov rahbar etib tayinlangandi.
