2-iyun kuni O‘zbekiston prezidenti Shavkat Mirziyoyev Cho‘lponota shahriga tashrif buyurib, Markaziy Osiyo va Yevropa Ittifoqi yetakchilarining ikkinchi sammiti doirasida Yevropa Kengashi Prezidenti Sharl Mishel bilan uchrashuv o‘tkazdi. Bu haqda prezident matbuot xizmati xabar qildi.

“Yevrokengash prezidenti Sharl Mishel davlatimiz rahbarini Konstitutsiya bo‘yicha referendumning natijalari bilan samimiy qutlab, Yangi O‘zbekistonda amalga oshirilayotgan ortga qaytmas demokratik yangilanishlar va iqtisodiy islohotlar dasturini to‘liq qo‘llab-quvvatlashini bildirdi hamda bo‘lajak muhim siyosiy tadbirlar muvaffaqiyatli o‘tishini tiladi”, — deyiladi xabarda.

Prezident matbuot kotibi Sherzod Asadov e’lon qilgan videoda Sharl Mishel Shavkat Mirziyoyevga “muhtaram prezident” deya yaqinlashib, keyin quchoqlab ko‘rishganini ko‘rish mumkin. Davlat rahbari “Anchadan beri uchrashmagandik”, “Men ham mamnunman, [uchrashuvni] intiqlik bilan kutgandim”, dedi. Rahbarlar nimadir haqida gaplashib kulishdi, shundan so‘ng Shavkat Mirziyoyev “Yaqin do‘stlar shunday bo‘ladi”, deb ta’kidladi.

Tomonlar 2022-yil oktabr oyida Toshkent shahrida o‘tgan oliy darajadagi uchrashuvda erishilgan kelishuvlarga muvofiq ikki tomonlama muloqot va almashinuvlarda yuqori sur’at kuzatilayotganini mamnuniyat bilan qayd etdilar.

Ushbu davrda O‘zbekistonda Mintaqaviy o‘zaro bog‘liqlik bo‘yicha birinchi konferensiya, navbatdagi Fuqarolik jamiyati forumi hamda Yevropa tiklanish va taraqqiyot banki Boshqaruvchilar kengashining yillik yig‘ilishi muvaffaqiyatli o‘tkazildi.

O‘zbekistonning YeI davlatlari bilan tovar ayirboshlash hajmi joriy yil boshidan buyon 70 foizga oshdi. Yevropaning yetakchi kompaniyalari ishtirokida mamlakat iqtisodiyotining yuqori texnologik tarmoqlaridagi investitsiya loyihalari portfeli 20 milliard yevrodan ortdi.

O‘zbekiston va YeI yetakchilari ikki tomonlama savdoni diversifikatsiya qilish va hajmini oshirish, GSP+ imtiyozli savdo tizimining amal qilish muddatini uzaytirish, samarali transport yo‘nalishlari, eng avvalo, Transkaspiy tranzit yo‘lagini rivojlantirish, “yashil” energetika, innovatsiyalar va yuqori texnologiyalar, raqamlashtirish, ekologiya, ta’lim, turizm va boshqa sohalarda qo‘shma dasturlarni amalga oshirish masalalariga alohida to‘xtaldilar.

Mintaqaviy kun tartibidagi dolzarb masalalar yuzasidan ham fikr almashildi. Afg‘oniston bo‘yicha maslahatlashuvlarni va ushbu mamlakatga insonparvarlik yordamini davom ettirish muhimligi ta’kidlandi.