13-may kuni tushdan so‘ng Samarqand shahrida 59-sonli “Nurli maskan” maktabining 19 yoshli o‘quvchisini avtobus urib ketib, vafot etdi. Bu haqda viloyat IIB xabar berdi.
Ko‘rish bilan bog‘liq muammosi bor bola “Rudakiy” mahallasi hududidan o‘tuvchi “Beruniy-Gagarin” yo‘nalishidagi avtomobil yo‘lidan o‘tayotgan bo‘lgan. Shu vaqtda Isuzu avtobusi haydovchisi uni urib yuborib, yo‘l-transport hodisasini sodir qilgan.
Oqibatda tan jarohati olgan piyoda shifokorlar tomonidan ko‘rsatilgan tibbiy yordamlarga qaramasdan, 15-may kuni shifoxonada vafot etgan.
Samarqand IIB matbuot xizmatining “Gazeta.uz”ga ma’lum qilishicha, marhum o‘qigan maktab yonida ovozli svetofor mavjud. YTH esa boshqa hududda ro‘y bergan.
Holat yuzasidan JKning 266-moddasi 2-qismi (Transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan. Tergov ketmoqda. Agar haydovchi aybdor deb topiladigan bo‘lsa, u muayyan huquqdan mahrum etilib, 7 yilgacha ozodlikdan mahrum qilinishi mumkin.
Avvalroq, prezident qaroriga asosan, yil yakuniga qadar ko‘zi ojiz va zaif ko‘ruvchi bolalar yashaydigan hududlarda ovozli svetoforlar va innovatsion yo‘l belgilari o‘rnatilishi aytilgandi.
