Hafta davomida O‘zbekistonda havo harorati ko‘tarilib boradi, asosan kam bulutli va quruq ob-havo bo‘ladi. O‘zgidromet matbuot xizmati xabariga ko‘ra, hafta o‘rtasiga kelib kunlar +38 darajagacha isishi mumkin.
Harorat kechalari +13…+18, kunduz kunlari +30…+35 darajagacha yetadi. Janubda va cho‘l hududlarda harorat bundan-da yuqori bo‘lishi, +36…+38 darajaga yetishi mumkin. Bu may oyining ushbu davri uchun o‘rtacha ko‘p yillik qiymatlardan +5…+7 darajaga yuqoridir.
12-mayda respublika hududiga Turkmaniston hududlaridan nisbatan nam havo kirib keladi. Toshkent, Samarqand, Jizzax, Sirdaryo, Qashqadaryo, Surxondaryo viloyatlarida ba’zi joylarda qisqa muddatli yomg‘ir yog‘ishi, momaqaldiroq bo‘lishi mumkin. Kunduzgi havo harorati +2…+3 darajaga pasayib, o‘rtacha +27…+32 daraja bo‘ladi.
8−9-may kunlari shimolda, 11−12-may kunlari esa respublika bo‘yicha ba’zi joylarda shamol tezligi 13−18 m/s gacha kuchayishi, ayrim joylarda chang-to‘zonlar bilan kuzatilishi mumkin. Tog‘oldi va tog‘li hududlarda 8 va 11−12-mayda momaqaldiroq bilan mahalliy yomg‘irlar yog‘ishi mumkin.
Toshkent shahrida ham 8−11-mayda havo asosan kam bulutli bo‘ladi, yog‘ingarchilik kutilmaydi. Harorat 8-mayda +25…+27, 10−11-may kunlari +32…+34 darajagacha asta-sekin ko‘tariladi. 12-mayda qisqa muddatli yomg‘ir yog‘ishi, momaqaldiroq bo‘lishi mumkin. Kunduzgi harorat nisbatan pasayadi.
