1-may kuni Toshkentda boks bo‘yicha jahon chempionati (IBA) boshlandi. Unda O‘zbekiston sharafini 13 nafar bokschi himoya qilmoqda.
1-may
-60 kg vazn toifasidagi Mujibillo Tursunov terma jamoa safida birinchi bo‘lib nepallik Singh Varinderni mag‘lub etdi — 5:0. 3-may kuni Tursunov navbatdagi g‘alabaga erishdi, bu safar gambiyalik Merri Kor mag‘lub etildi (5:0).
8-may kuni bo‘lib o‘tadigan navbatdagi bosqichda o‘zbekistonlik bokschi Afrika hamda Afrika o‘yinlari chempioni marokashlik Muhammed Hamutga qarshi bahs olib boradi.
2-may
Ruslan Abdullayev (-63,5 kg) turnirdagi ilk jangida puerto-rikolik Manuel Febusni (5:0) yengdi. 4-may kuni o‘zbekistonlik sportchi ispaniyalik Oyer Ibarreche ustidan muddatidan oldin g‘alaba qozondi.
6-may kuni bo‘lib o‘tgan navbatdagi jangida esa u mavrikiylik Richanro Kolin ustidan g‘olib bo‘ldi. Abdullayev JCHdagi uchinchi jangida 5:0 hisobida katta ustunlik evaziga g‘alabaga erishib, chorak finalga yo‘l oldi. U endi fransiyalik Lounes Xamrouiga qarshi ringga ko‘tariladi.
Jasurbek Yo‘ldoshev (-80 kg) raqibi jazoirlik Younes Nemouchni (5:0) mag‘lub etgan bo‘lsa, keyingi bosqichda iordaniyalik Huseyn Iashishga imkoniyatni boy berib qo‘ydi (3:4).
Shohjaxon Abdullayev (-86 kg) qirg‘izistonlik Erkin Adilbek ullu ustidan 5:0 hisobida ishonchli g‘alaba qozondi. 8-may, dushanba kuni u Tailanddagi Osiyo chempionatida “nokaut uchun qasos olmoqchi” bo‘lgan qozog‘istonlik bokschi Sagindik Togambay bilan ringga chiqadi.
3-may
-71 kg vazn toifasidagi Saidjamshid Jafarov mozambiklik Osorio Muxangdan ustun keldi (5:0). 6-may, shanba kuni u meksikalik bokschi Alonso Verde bilan ringga chiqadi.
4-may
Shodiyorjon Meliqo‘ziyev (-48 kg gacha) nepallik Rabin Tapani 5:0, Hasanboy Do‘smatov (-51 kg) ham meksikalik Albert Ximenesni 5:0, Bahodir Jalolov (+92 kg) esa bahraynlik Danis Latipovni 5:0 hisobida mag‘lub etdi.
5-may
Lazizxon Мuлложонов (-92 kg) ilk jangida kolumbiyalik Marlo Xartadoni (5:0) mag‘lub etdi.
Abdumalik Xalokov (-57 kg) gayanalik bokschi Kevin Alikokdan (5:0) ustun keldi va keyingi davraga yo‘l oldi.
6-may kungi janglar:
- -67 kg: Asadxo‘ja Mo‘ydinxo‘jayev — Yuto Vakita (Yaponiya) (soat 19:10 dan so‘ng)
- -71 kg: Saidjamshid Jafarov — Alonso Verde (Meksika) (soat 19:25 dan so‘ng).
Boks bo‘yicha erkaklar o‘rtasidagi IBA jahon chempionatida 107 davlatdan 538 nafar sportchi ishtirok etmoqda. Musobaqalar 13 ta vazn toifasida o‘tkaziladi. Final janglari 13 va 14-may kunlariga belgilangan.
