Senatning qirqinchi yalpi majlisida “O‘zbekiston Respublikasining Ma’muriy javobgarlik to‘g‘risidagi kodeksiga o‘zgartishlar va qo‘shimcha kiritish haqida”gi qonuni muhokama qilindi. Unga muvofiq endilikda daraxt va butalarni, boshqa o‘simliklarni va nihollarni qonunga xilof ravishda kesganlik, kundakov qilganlik, shikastlantirganlik, yo‘q qilganlik yoki boshqa joyga ko‘chirib o‘tkazganlik uchun jarima miqdorlari oshiriladi.
Endilikda daraxtlar, butalar, boshqa o‘simliklar va yosh nihollarni noqonuniy kesish, ildizi bilan sug‘orish, shikastlash, nobud qilish yoki ko‘chirib o‘tkazish uchun fuqarolarga Ma’muriy javobgarlik to‘g‘risidagi kodeksning 79-moddasi 1-qismi bilan BHMning 10 baravaridan 15 baravarigacha (avval 5 baravaridan 10 baravarigacha edi), mansabdor shaxslar uchun esa 15 baravaridan 20 baravarigacha (avval 10 baravaridan 15 baravarigacha edi) jarima belgilanadi.
Ma’muriy jazo qo‘llanilganidan keyin bir yil davomida takror sodir etilgan xuddi shunday huquqbuzarliklar uchun (Ma’muriy javobgarlik to‘g‘risidagi kodeksning 79-moddasi 2-qismi) fuqarolar uchun jarima 15 baravaridan 25 baravarigacha (avval 10 baravaridan 20 baravarigacha), mansabdor shaxslarga esa 25 baravaridan 35 baravarigacha (avval 20 baravaridan 30 baravarigacha edi). Bundan tashqari, ushbu qoidabuzarlik uchun jazolar soniga 15 sutkagacha ma’muriy qamoq jazosi qo‘shiladi.
Bundan tashqari, qimmatbaho daraxt va buta turlarini kesish, ildizi bilan sug‘orish, shikastlash yoki yo‘q qilishga olib kelgan loyiha hujjatlarini ishlab chiqish uchun ma’muriy javobgarlik joriy etiladi (Ma’muriy javobgarlik to‘g‘risidagi kodeksining 79-moddasi 4-qismi). Ushbu qoidabuzarlik mansabdor shaxslarga 15 baravaridan 25 baravarigacha jarima solishga olib keladi.
Shuningdek, noqonuniy daraxt kesganlik yoki kundakov qilganlik uchun Ma’muriy javobgarlik to‘g‘risidagi kodeksning 4 ta moddasida ma’muriy javobgarlik belgilangan. Mazkur moddalarda bir xil ma’muriy huquqbuzarlik uchun turli miqdordagi jarimalar va nomutanosiblik mavjudligi inobatga olinib, o‘zgartishlar orqali bir turdagi ma’muriy xuquqbuzarlikka nisbatan bitta moddada bir xil javobgarlikni belgilash nazarda tutilmoqda.
Ta’kidlanishicha, mazkur qonunning qabul qilinishi daraxtlar va butalarni qonunga xilof ravishda kesilishi, kundakov qilinishi, shikastlantirilishi yoki yo‘q qilinishi bilan bog‘liq ma’muriy huquqbuzarliklarning oldini olish, bu borada jismoniy va yuridik shaxslarning mas’uliyatini oshirish, shuningdek huquqbuzarliklar profilaktikasi va davlat ekologik nazoratining samarali tashkil etilishiga xizmat qiladi.
Qonun senatorlar tomonidan ma’qullandi.
