O‘zbekiston Vazirlar Mahkamasi tuzilmasida yana Davlat tilini rivojlantirish departamenti tashkil etilmoqda. Bu prezidentning 20-apreldagi hukumat ijro etish tuzilmasini takomillashtirish chora-tadbirlari to‘g‘risidagi farmonida nazarda tutilgan.
Hujjat davlat tilining davlat va jamiyat hayotidagi mavqeini oshirish, uni ilmiy asosda har tomonlama rivojlantirish va qo‘llash doirasini kengaytirish, zamonaviy ilm-fan rivojida davlat tilining o‘rni va rolini oshirish maqsadida qabul qilindi.
Departament tashkil etilishi munosabati bilan qo‘shimcha ajratilayotgan shtat birliklari prezidenti Administratsiyasining 5 ta shtat birligini qisqartirish hisobidan kiritiladi.
Shu tariqa prezidentning 21-dekabrdagi Yangi O‘zbekiston ma’muriy islohotlarini amalga oshirish to‘g‘risidagi farmoni bilan tugatilgan Davlat tilini rivojlantirish departamenti qayta paydo bo‘ldi.
Departamentning o‘zi ilk bor 2021-yil 21-oktabrda, o‘zbek tiliga davlat tili maqomi berilganining 30 yilligi kunida tashkil etilgan. 2022-yilda departament Vazirlar Mahkamasining Ma’naviyat va davlat tilini rivojlantirish masalalari departamentiga aylantirilgan.
