Bosh prokuratura Toshkentda 16 yoshli qiz janjal sabab binoning 3-qavatidan o‘zini tashlagani haqida tarqalgan xabar yuzasidan o‘rganish olib bordi.
Aniqlanishicha, 5-aprel kuni Yunusobod tumanida yashovchi 9-sinf o‘kuvchisi X.M. (16 yoshli qiz) yashab kelayotgan uyning 3-qavatida balkon oynasini artayotgan vaqtida ehtiyotsizligi oqibatida yiqilib, jarohat olgan.
X.M.ga tez tibbiy yordam ko‘rsatilib, shifoxonaga olib ketilgan. Hozirda uning ahvoli yaxshi ekani ma’lum qilindi.
Holat yuzasidan sud-tibbiy ekspertizasi tayinlangan. Yunusobod tumani prokuraturasi tomonidan tergovga qadar tekshiruv harakatlari olib borilmoqda.
