O‘zbekiston 20 yoshgacha bo‘lgan yoshlar terma jamoasi yarim himoyachisi Shaxriyor Jabborov doping test natijalari tufayli futboldan vaqtincha chetlashtirildi. Bu haqda Osiyo futbol konfederatsiyasi (OFK) Tartib-intizom qo‘mitasining 15-apreldagi qarorida xabar qilingan.
Ma’lum bo‘lishicha, futbolchining 11-mart kuni Toshkentda Avstraliyaga qarshi chorak final uchrashuvi kuni topshirgan doping-testi “taqiqlangan modda aniqlangani” tufayli ijobiy natija bergan.
Yakuniy qaror chiqqunga qadar OFK Tartib-intizom qo‘mitasi Jabborovni futbol bilan bog‘liq barcha tadbirlar, jumladan, ichki, xalqaro o‘rtoqlik va rasmiy o‘yinlardagi ishtirokini vaqtinchalik to‘xtatishga qaror qildi.
20 yoshli Shaxriyor Jabborov Toshkentning “Paxtakor” klubida to‘p suradi. U O‘zbekiston yoshlar terma jamoasi tarkibida finalda Iroqni mag‘lub etib (1:0) U-20 Osiyo kubogi chempioniga aylangandi.
