13-aprel kuni Samarqandda O‘zbekiston, Eron, Pokiston, Rossiya, Tojikiston, Turkmaniston va Xitoy TIV rahbarlari ishtirokida Afg‘onistonga qo‘shni davlatlar to‘rtinchi vazirlar uchrashuvi bo‘lib o‘tdi. Bu haqda O‘zbekiston TIV xabar berdi.
Uchrashuvda Afg‘oniston muvaqqat hukumati tashqi ishlar vaziri Amir Xon Muttaqiy va toliblarning boshqa vakillari ishtirok etishdi, deya ma’lum qildi Afg‘oniston TIV matbuot kotibi o‘rinbosari Hafiz Zia Ahmad o‘zining Twitter`dagi sahifasida.
Tadbir O‘zbekiston tomoni raisligida bo‘lib o‘tdi.
“Biz, Afg‘onistonning yaqin qo‘shnilari sifatida boshqalardan ko‘ra mamlakatdagi vaziyatning tezroq barqarorlashuvidan ko‘proq manfaatdormiz. Qolaversa, xohlaymizmi-yo‘qmi, bugun Afg‘oniston iqtisodiyotini tiklash va afg‘on xalqiga gumanitar yordam ko‘rsatish uchun asosiy mas’uliyat yelkamizga tushdi”, dedi O‘zbekiston TIV rahbari Baxtiyor Saidov anjuman ochilishida.
Uning so‘zlariga ko‘ra, xalqaro hamjamiyat faqat afg‘on xalqiga gumanitar yordam ko‘rsatish bilan cheklanib qolmasligi kerak — mamlakatda uning tinch kelajagi uchun asos bo‘ladigan iqtisodiy va infratuzilma loyihalarini ilgari surish zarur.
Foto: O‘zbekiston TIV.
Vazir vazifasini bajaruvchi Afg‘onistonga qo‘shni davlatlar maslahatlashuvlari formati dolzarbligi “ushbu mamlakatdagi mavjud vaziyatga nisbatan qo‘shma yondashuvlar va harakatlarni rivojlantirishga hissa qo‘shishini ta’kidladi”.
“Afg‘onistondagi vaziyat og‘irligicha qolmoqda. Ishonchimiz komilki, yaqin kelajakda Afg‘oniston masalasi mintaqaviy va global xavfsizlikning muhim omillaridan biri bo‘lib qolaveradi, bu ko‘plab mamlakatlar, birinchi navbatda, qo‘shni davlatlar manfaatlariga ta’sir qiladi”, — dedi Baxtiyor Saidov.
Uning ta’kidlashicha, xalqaro hamjamiyat Kobuldagi yangi hukumatdan, o‘ziga olgan mas’uliyatni, birinchi navbatda inklyuziv hukumat tuzish, ayollar va milliy ozchiliklarning huquqlarini hurmat qilish va terroristik guruhlar bilan aloqalarni uzishni kutmoqda.
Afg‘oniston tashqi ishlar vaziri Amir Xon Muttaqiy o‘z nutqida Samarqanddagi uchrashuv “mintaqamizning barqarorligi, xavfsizligi va iqtisodiy ravnaqi yo‘lida birgalikdagi sadoqatimizni namoyish etishini ta’kidladi”.
Foto: twitter.com/HafizZiaAhmad1.
“Bu bizning umumiy kelajagimiz borligidan dalolat beradi hamda biz barqarorlik va xavfsizlik bilan bog‘liq imkoniyatlardan to‘liq foydalanish, umumiy tahdidlarga mas’uliyat bilan javob berish uchun harakatlarimizni birlashtirishimiz kerak. Afg‘oniston mintaqa bilan yaqin va muvofiqlashtirilgan hamkorlikka tayyor”, — dedi u.
Uning qo‘shimcha qilishicha, “Tolibon” mintaqa mamlakatlari Afg‘onistonda barqaror va iqtisodiy farovon sharoit yaratish uchun birgalikda harakat qiladi va bu Afg‘onistonning konstruktiv rol o‘ynashiga yordam beradi, deb umid qilmoqda.
“Biz ham mas’uliyatli hukumat sifatida o‘z majburiyatlarimizni bajarishga tayyormiz. Hech qanaqa holatda Afg‘onistonni salbiy to‘qnashuvlar va noqonuniy raqobat maydoniga aylantirishga yo‘l qo‘ymaymiz”, — dedi Amir Xon Muttaqiy.
Uning so‘zlariga ko‘ra, amaldagi hukumat tashkil etilganidan deyarli ikki yil o‘tgan bo‘lsada, “ildizlari Afg‘onistonga borib taqaladigan xavfsizlik sohasida hech qanday jiddiy hodisasi sodir bo‘lmagan”.
Mintaqa davlatlari ularning siyosati Afg‘onistonga nisbatan salbiy targ‘ibot va qarama-qarshi kuchlarning hiyla-nayranglari qurboniga aylanmasligi uchun hushyor turishlari kerak, deya ta’kidladi u.
“Aksincha, Afg‘oniston mintaqaviy xavfsizlik, barqarorlik va iqtisodiy aloqalar prizmasidan qarash yo‘lidan boradi. Siyosiy, xavfsizlik va iqtisodiy sohalardagi ijobiy va qat’iy mintaqaviy hamkorlik Afg‘oniston va butun mintaqa manfaatlarini ta’minlashda foydali bo‘lishi mumkin”, — dedi Amir Xon Muttaqiy.
Forum davomida tomonlar Afg‘onistondagi mavjud vaziyat, ushbu mamlakatning amaldagi rasmiylari tomonidan jahon hamjamiyatining asosiy talablari — inklyuziv hukumat yaratish, afg‘onistonlik ayollarning mehnat va ta’lim olish imkoniyatini hamda milliy ozchiliklarning huquqlarini ta’minlash kabi asosiy talablarning bajarilishi muhokama qilindi.
Afg‘oniston xalqiga gumanitar yordam ko‘rsatish va mamlakat milliy iqtisodiyotini tiklashga qaratilgan birgalikdagi harakatlar mexanizmini ishlab chiqish zarurligi ta’kidlandi.
Xalqaro terrorizm, giyohvand moddalar ishlab chiqarish va ularning kontrabandasiga qarshi kurashda Afg‘onistonga qo‘shni davlatlarning chora-tadbirlarini kuchaytirish muhimligi ta’kidlandi.
Markaziy va Janubiy Osiyo o‘rtasidagi mintaqaviy o‘zaro bog‘liqlikning asosiy omili sifatida Afg‘oniston salohiyatini ro‘yobga chiqarishga ko‘maklashish muhimligi qayd etildi.
Shu nuqtayi nazardan, tomonlar Afg‘oniston hududida qo‘shni davlatlar ishtirokida nafaqat yangi ish o‘rinlari yaratish, balki bu mamlakatning mintaqaviy iqtisodiy jarayonlarga yanada faol integratsiyalashuvga xizmat qiluvchi infratuzilma va ijtimoiy-iqtisodiy loyihalarni amalga oshirish tarafdori ekanliklarini bildirdi.
