«Ular» loyihasining 13 fevral kuni e’lon qilingan maxsus soni yoshlarga bag‘ishlandi. Unda filolog Diyora Abdujabborova, «Kunduziy» loyihasi muallifi Hafiz Yusupov, loyiha menejeri Matluba Jo‘raboyeva, kopirayter Quvonch G‘ayratov, iqtisodchi Sanjar Aslanov, HR mutaxassisi Zuhra Rahimjonova va jurnalist Akbarali Omonturdiyev, shuningdek, sotsiolog Hasan Akromov «yoshlar nima xohlaydi?» degan umumiy savolga javob bergan.
Ko‘rsatuvda o‘zini ko‘p jihatdan «o‘tish davri qurboniga aylangan arosat» deb hisoblaydigan avlod vakillari jamiyatdagi stereotiplar, urf-odatlar, serchiqim to‘ylar to‘g‘risida, «ma’naviyat», «mentalitet» tushunchalari haqida tanqidiy fikrlar bildirgan. Avlodlar to‘qnashuvi haqida fikr bildirarkan, ko‘rsatuv mehmonlari «ota-ona bilganni farzand bilmaydi, ota-ona farzandi uchun eng yaxshi narsani beradi» degan tushunchalar bugun kun yoshlari uchun to‘g‘ri kelmasligini ta’kidlaydi.
Sotsiolog Hasan Akromov ko‘rsatuvdagi chiqishida 2000−2010 yillarda tug‘ilgan Z-avlodga imkoniyat berish kerakligini ta’kidlagan. «Z-avlod bizni eng yuqori cho‘qqilarga olib chiqadi, bu aniq», deydi u. Ko‘rsatuv muallifi Laziz Hamidov ham yoshlarga amalda imkoniyat berishga chaqirarkan, shunday xulosa qiladi: «Yoshlar erkinlik xohlayapti. Ularga yordam bermayapmizmi, shunchaki xalaqit ham bermaslik kerak».
Ko‘rsatuv ijtimoiy tarmoqlarda, ayniqsa Twitter’da munozaralarga sabab bo‘ldi. Bir guruh foydalanuvchilar ko‘rsatuv mehmonlarini qo‘llab-quvvatlagan bo‘lsa, boshqa bir guruh nafaqat ko‘rsatuv mehmonlari, balki ijodkorlarini ham tanqid qildi. Xususan, ular orasida ko‘rsatuv biryoqlama bo‘lib qolgani haqida fikr bildirganlar, ko‘rsatuv mehmonlarini esa hamma yoshlar nomidan gapirishga haqli bo‘lmagan «marginallar» ekanini ta’kidlaganlar ham bor.
Ayni vaqtda, shu ko‘rsatuv bahona yoshlarning fikrlari bilan qiziqqanlar ham bor. Jumladan, Twitter foydalanuvchisi Dilshod Hoshimov 30 yoshgacha bo‘lgan yoshlardan ular davlatdan, hayotdan, jamiyatdan, yaqinlaringizdan nima istashlarini, umuman olganda ularga nimalar kerakligini so‘ragan (va bu savolga birinchi bo‘lib o‘zi javob berarkan, unga erkinlik, yaxshi hayot va xotirjamlik kerakligini ta’kidlagan).
Dilshod Hoshimov berilgan javoblardan kelib, yoshlar asosan erkinlik, begonalar ularning hayotiga aralashmasligi, yaxshi daromad va tinchlikni istashini yozgan. Uning qayd etishicha, ko‘rsatuvning «marginallar» deya ta’riflangan mehmonlari uning savoliga javob bergan «200 dan ortiq kishining istaklarini aytgan [ekan], deyarli». «Javob berganlar diniy va dunyoviy turli dunyoqarashga ega, istaklari esa o‘xshash ekan», deya xulosa qiladi Hoshimov.
«Gazeta.uz» Dilshod Hoshimovning savoliga berilgan javoblarning ayrimlarini e’tiboringizga havola qiladi (ushbu material tayyorlanayotgan vaqtda Hoshimovning bu savoliga 200 dan ortiq javob qaytarilgandi).
