«Улар» лойиҳасининг 13 февраль куни эълон қилинган махсус сони ёшларга бағишланди. Унда филолог Диёра Абдужабборова, «Кундузий» лойиҳаси муаллифи Ҳафиз Юсупов, лойиҳа менежери Матлуба Жўрабоева, копирайтер Қувонч Ғайратов, иқтисодчи Санжар Асланов, HR мутахассиси Зуҳра Раҳимжонова ва журналист Акбарали Омонтурдиев, шунингдек, социолог Ҳасан Акромов «ёшлар нима хоҳлайди?» деган умумий саволга жавоб берган.
Кўрсатувда ўзини кўп жиҳатдан «ўтиш даври қурбонига айланган аросат» деб ҳисоблайдиган авлод вакиллари жамиятдаги стереотиплар, урф-одатлар, серчиқим тўйлар тўғрисида, «маънавият», «менталитет» тушунчалари ҳақида танқидий фикрлар билдирган. Авлодлар тўқнашуви ҳақида фикр билдираркан, кўрсатув меҳмонлари «ота-она билганни фарзанд билмайди, ота-она фарзанди учун энг яхши нарсани беради» деган тушунчалар бугун кун ёшлари учун тўғри келмаслигини таъкидлайди.
Социолог Ҳасан Акромов кўрсатувдаги чиқишида 2000−2010 йилларда туғилган Z-авлодга имконият бериш кераклигини таъкидлаган. «Z-авлод бизни энг юқори чўққиларга олиб чиқади, бу аниқ», дейди у. Кўрсатув муаллифи Лазиз Ҳамидов ҳам ёшларга амалда имконият беришга чақираркан, шундай хулоса қилади: «Ёшлар эркинлик хоҳлаяпти. Уларга ёрдам бермаяпмизми, шунчаки халақит ҳам бермаслик керак».
Кўрсатув ижтимоий тармоқларда, айниқса Twitter’да мунозараларга сабаб бўлди. Бир гуруҳ фойдаланувчилар кўрсатув меҳмонларини қўллаб-қувватлаган бўлса, бошқа бир гуруҳ нафақат кўрсатув меҳмонлари, балки ижодкорларини ҳам танқид қилди. Хусусан, улар орасида кўрсатув бирёқлама бўлиб қолгани ҳақида фикр билдирганлар, кўрсатув меҳмонларини эса ҳамма ёшлар номидан гапиришга ҳақли бўлмаган «маргиналлар» эканини таъкидлаганлар ҳам бор.
Айни вақтда, шу кўрсатув баҳона ёшларнинг фикрлари билан қизиққанлар ҳам бор. Жумладан, Twitter фойдаланувчиси Дилшод Ҳошимов 30 ёшгача бўлган ёшлардан улар давлатдан, ҳаётдан, жамиятдан, яқинларингиздан нима исташларини, умуман олганда уларга нималар кераклигини сўраган (ва бу саволга биринчи бўлиб ўзи жавоб бераркан, унга эркинлик, яхши ҳаёт ва хотиржамлик кераклигини таъкидлаган).
Дилшод Ҳошимов берилган жавоблардан келиб, ёшлар асосан эркинлик, бегоналар уларнинг ҳаётига аралашмаслиги, яхши даромад ва тинчликни исташини ёзган. Унинг қайд этишича, кўрсатувнинг «маргиналлар» дея таърифланган меҳмонлари унинг саволига жавоб берган «200 дан ортиқ кишининг истакларини айтган [экан], деярли». «Жавоб берганлар диний ва дунёвий турли дунёқарашга эга, истаклари эса ўхшаш экан», дея хулоса қилади Ҳошимов.
«Газета.uz» Дилшод Ҳошимовнинг саволига берилган жавобларнинг айримларини эътиборингизга ҳавола қилади (ушбу материал тайёрланаётган вақтда Ҳошимовнинг бу саволига 200 дан ортиқ жавоб қайтарилганди).
