Toshkent hokimi Jahongir Ortiqxo‘jayev mamlakat hududi, xususan poytaxtga keskin sovuq ob-havo kirib kelishi kutilayotgani munosabati bilan har qanday talofatlarning oldini olish bo‘yicha yig‘ilish o‘tkazdi. Bu haqda shahar ma’muriyati matbuot xizmati xabar qildi.
Shahar hokimi mutasaddi shaxslarga quyidagi topshiriqlarni berdi:
anomal sovuq kunlar davrida, o‘n kun davomida: 9 dan 18 yanvargacha shahar va tuman hokimliklarida, boshqarmalar va ularning tuman bo‘limlarida har qanday majlislar (jumladan Zoom shaklida), tadbirlar, mas’ullarni asosiy faoliyatidan chalg‘ituvchi boshqa yig‘ilishlarni o‘tkazish taqiqlanadi;
vaziyatlarni boshqarish yuzasidan topshiriqlar telefon va onlayn aloqa tizimlari orqali to‘g‘ridan-to‘g‘ri beriladi;
qolipli non ishlab chiqaruvchilarga gaz va elektr energiyasi uzluksiz yetkazib berilishini nazoratga olish;
oziq-ovqat ishlab chiqaruvchi korxonalarning uzluksiz ishlashini ta’minlash;
shahar jamoat transportining tizimli ishlashi choralarini ko‘rish;
markaziy va ichki yo‘llarni tezkorlik bilan qor va muzlamalardan tozalashni tashkil qilish;
boshqaruv servis kompaniyalari tomonidan ko‘p qavatli uylar yo‘laklarini qor va muzlamalardan o‘z vaqtida tozalashni ta’minlash;
elektr tizimida avariyalarni tezkor bartaraf etish;
tug‘ruqxonalar, shifoxonalar, muruvvat va mehribonlik uylarining issiqlik ta’minotini alohida nazoratga olish, ulardagi mavjud elektr generatorlarini yoqilg‘i bilan ta’minlash, to‘xtovsiz ishlashi uchun shay holatga keltirish;
favqulodda vaziyatlar boshqarmasi tomonidan 2 kun muddatda jamoat joylarida yong‘in xavfsizligini ta’minlash bo‘yicha qayta ko‘rik-nazorat tadbirlarini o‘tkazilishini ta’minlash;
aholini jamoat transportidan foydalanishiga keng imkoniyatlar yaratish va imkon qadar shaxsiy transport vositasidan foydalanmaslikni tavsiya etish;
navbatchilik, shtablar va call-markazlar faoliyatidagi aloqa telefonlarining uzluksiz ishlashini nazoratga olish;
2 kun muddatda 103 tez tibbiy yordam mashinalarini tibbiy anjom va dori vositalari bilan ta’minlanganlik darajasini ko‘zdan kechirib, yetishmovchiliklarni to‘ldirish;
ko‘chada xizmat qilayotgan yo‘l harakati xavfsizligi xizmati va obodonlashtirish xodimlarini issiq choy va yegulik, ixcham termos idishlari bilan ta’minlash va hokazo.