Samarqandda tartibni buzib, qoidalarni mensimagan haydovchiga 15 sutka ma’muriy qamoq jazosi tayinlandi, deya xabar bermoqda Yo‘l harakati xavfsizligi xizmati.

Ma’lum qilinishicha, 31 dekabr kunidan 1 yanvar kuniga o‘tar kechasi soat 01:00 larda shaharning «Xo‘ja Ahror Valiy» ko‘chasida davlat raqam 01 L700 OA bo‘lgan Mercedes-Benz avtomobili haydovchisi R. A. (1987 y. t.) atrofdagi fuqarolar e’tiborini jalb etish maqsadida xavfli bo‘lishiga qaramasdan turli manyovrlar bilan driftlar bajargan.

«Jamoat joyida yurish-turish qoidalarini buzganligi yetmagandek, uni tartibga chaqirishga uringan xodimlarning ham qonuniy talablariga bo‘ysunmagan», — deyiladi xabarda.

Yuqoridagi holatlar bo‘yicha to‘plangan hujjatlar 3 yanvar kuni Jinoyat ishlari bo‘yicha Samarqand shahar sudi tomonidan o‘rganilib, fuqaro R. A.ning xatti-harakatlarida Ma’muriy javobgarlik to‘g‘risidagi kodeksning 183-modda (Mayda bezorilik), 194-modda 1-qism (Ichki ishlar organlari xodimining qonuniy talablarini bajarmaslik) va 195-moddasi (Ichki ishlar organlari xodimlarining o‘z xizmat burchlarini bajarishlariga qarshilik ko‘rsatish)da nazarda tutilgan huquqbuzarlik alomatlari mavjud deb topildi.

Unga nisbatan 15 sutka ma’muriy qamoq jazosi tayinlandi.