Toshkent shahar hokimligi huzuridagi Raqamli rivojlanish departamenti tomonidan geografik obyektlar (ko‘chalar, tor ko‘chalar, berk ko‘chalar va boshqalar)ga nom berish va nomlarini o‘zgartirish bo‘yicha fuqarolardan takliflar qabul qilish hamda eng yaxshilar uchun ovoz berish uchun veb-sayt (geonom.tashkent.uz) ishga tushirildi.
Poytaxt hokimligi matbuot xizmati sayt hozircha test rejimida ishlayotganini ma’lum qildi.
Hozirda sayt Toshkent shahridagi yer usti metro liniyasidagi bekatlarga nom berish bo‘yicha takliflar yig‘moqda. Ovoz berishga qo‘yilgan obyektlar xaritada ko‘rsatiladi va fotosuratlar, shuningdek qisqacha izoh bilan birga ko‘rsatiladi.
Toshkent shahrida geografik obyektlarni nomlash bilan Geografik obyektlarni nomlash va qayta nomlash masalalari bo‘yicha Toshkent shahar komissiyasi shug‘ullanadi. Shahar komissiyasi nafaqat aholining fikrini inobatga oladi yoki ko‘cha, xiyobon, mahalla va maydonlarga mos nom tanlaydi, balki arxiv, kartografik va boshqa tarixiy ma’lumotlarni o‘rganadi, doimiy ravishda soha mutaxassislarini, masalan, tarixchi, etnograf, geograf va tilshunoslarni jalb qiladi, qaror qabul qilishda mahalliy hokimiyat organlariga, tashkilot va korxonalarga zarur bo‘lgan ma’lumotlarni olish uchun murojaat etadi.
Noyabr oyi boshida O‘zbekiston prezidenti Shavkat Mirziyoyev geografik obyektlarga nom berish to‘g‘risidagi qonunga o‘zgartirish va qo‘shimchalar kiritish haqidagi hujjatni imzolagandi. Qonun geografik obyektlarga nom berish va ularni qayta nomlashda mahalliy aholining fikrini hisobga olish tartibini belgilaydi.
Aholi punktlarining tarkibiy qismlariga (mahallalar, xiyobonlar, ko‘chalar, maydonlar, bog‘lar, xiyobonlar) nafaqat O‘zbekiston, balki jahon tarixida chuqur iz qoldirgan shaxslarning nomlarini berish imkoniyati ham muhim o‘zgarish bo‘lgandi. Garchi ko‘plab obyektlar taniqli shaxslar — Aleksandr Pushkin, Lev Tolstoy, Shota Rustaveli, Yuriy Gagarin va boshqalar nomi bilan atalgan bo‘lsada, ilgari bunga qonun yo‘l qo‘ymasdi.
